Múlier timens Dóminum ipsa laudábitur.

Fílii eius beatíssimam prædicavérunt,

vir eius laudávit eam (T.P. allelúia).

Manum suam apéruit ínopi,

et palmas suas exténdit ad páuperem,

et panem otiósa non comédit (T.P. allelúia).

Deus, qui nos ánnua beátæ N. festivitáte lætíficas,

da, quæsumus, ut, quam venerámur offício,

étiam piæ conversatiónis sequámur exémplo.

Per Dóminum.

Concéde, quæsumus, omnípotens Deus,

ut veneránda nobis beatárum N. et N. intercéssio

tríbuat cæléste subsídium,

quarum vita mirábilis ómnibus salutáre præstat exémplum.

Per Dóminum.

Hóstias tibi, Dómine,

pro beátæ N. commemoratióne deférimus,

supplíciter deprecántes,

ut indulgéntiam nobis páriter cónferant et salútem.

Per Christum.

Símile est regnum cælórum hómini negotiatóri

quærénti bonas margarítas;

invénta autem una pretiósa margaríta,

dedit ómnia sua, et comparávit eam (T.P. allelúia).

Divíni operátio sacraménti, omnípotens Deus,

in hac festivitáte beátæ N.

illúminet nos páriter et inflámmet,

ut et sanctis iúgiter desidériis ferveámus,

et bonis opéribus abundémus.

Per Christum.