Da, quæsumus, omnípotens Deus,

ut ánima fámuli tui N. epíscopi,

cui famíliæ tuæ curam tradidísti,

cum multíplici labóris fructu

gáudia Dómini sui ingrediátur ætérna.

Qui tecum.

Imménsam cleméntiam tuam, Dómine,

supplíciter implorámus, ut hoc sacrifícium,

quod fámulus tuus N. epíscopus,

dum esset in córpore,

maiestáti tuæ pro salúte fidélium óbtulit,

ipsi nunc prosit ad véniam.

Per Christum.

Prosit, quæsumus, Dómine,

ánimæ fámuli tui N. epíscopi

misericórdiæ tuæ implórata cleméntia,

ut Christi, in quo sperávit et quem prædicávit,

ætérnum cápiat, his sacrifíciis, consórtium.

Qui vivit et regnat in sæcula sæculórum.