Si vis perféctus esse, vade,

vende quæ habes et da paupéribus,

et veni, séquere me, dicit Dóminus.

Pater sancte,

qui, licet fidéles omnes

ad perfectiónem caritátis invítas,

multos tamen excitáre non désinis,

ad Fílii tui vestígia préssius sequénda,

concéde, ut, quos tibi in sortem peculiárem elégeris,

conversatióne sua váleant regni tui signum osténdere

Ecclésiæ mundóque perspícuum.

Per Dóminum.

Famíliam tuam, quæsumus, Dómine, propítius réspice

et nova prole semper amplífica,

ut et fílios suos

ad propósitam caritátis perfectiónem addúcere,

et ad hóminum salútem efficáciter váleat laboráre.

Per Dóminum.

Múnera quæ tibi offérimus,

Pater sancte, súscipe miserátus,

et ómnibus, qui Fílium tuum per arctam viam imitári

læta sibi mente propónunt,

communiónem concéde fratérnam

et spiritálem libertátem.

Per Christum.

Amen dico vobis,

quod vos qui reliquístis ómnia,

et secúti estis me, céntuplum accipiétis

et vitam ætérnam possidébitis, dicit Dóminus.

Fámulos tuos, Dómine,

spiritáli cibo potúque confírma,

ut, evangélicæ semper vocatióni fidéles,

vivam ubíque Fílii tui imáginem repræséntent.

Qui vivit et regnat in sæcula sæculórum.

Huius, Dómine, virtúte sacraménti, da nobis, quæsumus,

perseverántem in tua voluntáte famulátum,

ut tuam caritátem mundo testári

et bona quæ sola non amittúntur

valeámus fórtiter inquírere.

Per Christum.