Dilígite inimícos vestros, dicit Dóminus;

benefácite his qui odérunt vos;

benedícite maledicéntibus vobis,

et oráte pro calumniántibus vos.

Deus, qui caritátis tuæ præcépto voluísti,

ut nos affligéntibus amórem impendámus sincérum,

da nobis ita novæ legis sequi mandáta,

ut bona pro malis réddere

et álii aliórum ónera portáre studeámus.

Per Dóminum.

Pacem cum ómnibus habére cupiéntes,

tibi, Dómine, pro his qui nobis adversántur

hoc sacrifícium offérimus,

et Fílii tui mortem commemorámus,

per quam, cum inimíci essémus, tibi reconciliáti sumus.

Per Christum.

Beáti pacífici, quóniam fílii Dei vocabúntur.

Beáti qui persecutiónem patiúntur propter iustítiam,

quóniam ipsórum est regnum cælórum.

Per hæc pacis nostræ mystéria,

da nos, Deus, cum ómnibus esse pacíficos,

et eos qui nobis adversántur

tibi gratos effícere, nobísque placátos.

Per Christum.