Ecclésiæ factus sum ego miníster,

secúndum dispensatiónem Dei quæ data est mihi in vos:

Christum nos annuntiámus,

ut exhibeámus omnem hóminem perféctum in Christo Iesu.

Deus, qui non própriis suffragántibus méritis,

sed sola ineffábilis grátiæ tuæ largitáte,

me famíliæ tuæ præésse voluísti,

tríbue me tibi digne persólvere

ministérium sacerdotális offícii,

plebémque commíssam, te in ómnibus gubernánte,

dirígere concéde.

Per Dóminum.

Deus, diérum temporúmque potens et benígne moderátor,

collátis in me per grátiam tuam propitiáre munéribus,

et, præséntis oblatiónis virtúte,

in hunc afféctum dírige cor plebis et sacerdótis,

ut nec pastóri obœdiéntia gregis,

nec gregi desit cura pastóris.

Per Christum.

Sicut diléxit me Pater, et ego diléxi vos;

manéte in dilectióne mea, dicit Dóminus.

Omnípotens sempitérne Deus,

orígo cunctárum perfectióque virtútum,

da mihi, quæsumus, huius participatióne mystérii,

et exercére quæ recta sunt et prædicáre quæ vera,

ut instructiónem grátiæ tuæ

fidélibus et agéndo præbeam et docéndo.

Per Christum.