Scio cui crédidi, et certus sum quia potens est

depósitum meum serváre in illum diem iustus iudex.

Dómine Deus, qui beátum Paulum apóstolum

ad prædicándum Evangélium mirabíliter designásti,

da fide mundum univérsum ímbui,

quam ipse coram régibus gentibúsque portávit,

ut iúgiter Ecclésia tua cápiat augméntum.

Per Dóminum.

Illo nos, quæsumus, Dómine, divína tractántes,

fídei lúmine Spíritus perfúndat,

quo beátum Paulum apóstolum

ad glóriæ tuæ propagatiónem collustrávit.

Per Christum.

In fide vivo Fílii Dei, qui diléxit me,

et trádidit semetípsum pro me.

Córporis et Sánguinis Fílii tui, Dómine,

communióne reféctis,

concéde, ut ipse Christus sit nobis vívere,

nihílque ab eius nos séparet caritáte,

et, beáto monénte Apóstolo,

in dilectióne cum frátribus ambulémus.

Per Christum.