DE SANCTISSIMA EUCHARISTIA
In hac Missa adhibetur color albus.
Ps 77, 23-25
Iánuas cæli apéruit Dóminus,
et pluit illis manna ad manducándum,
et panem cæli dedit eis:
panem angelórum manducávit homo.
Deus, qui humánæ redemptiónis opus
per Unigéniti tui paschále mystérium implevísti,
concéde propítius,
ut, qui Christi mortem et resurrectiónem
in sacramentórum signis annuntiámus fidénter,
salvatiónis tuæ contínuum experiámur augméntum.
Per Dóminum.
Salútis nostræ memoriále celebrántes,
cleméntiam tuam, Dómine, supplíciter exorámus,
ut hoc sacraméntum pietátis
fiat nobis signum unitátis et vínculum caritátis.
Per Christum.
Io 6, 51-52
Ego sum panis vivus,
qui de cælo descéndi, dicit Dóminus.
Si quis manducáverit ex hoc pane,
vivet in ætérnum;
et panis, quem ego dabo,
caro mea est pro mundi vita.
Sanctíficet nos, quæsumus, Dómine,
mensæ cæléstis participátio,
ut, per Corpus et Sánguinem Christi,
fratérnitas cuncta copulétur.
Per Christum.