Modo véniet Dominátor Dóminus,

et vocábitur nomen eius Emmánuel, quia Nobíscum-Deus.

Preces pópuli tui, quæsumus, Dómine, cleménter exáudi,

ut, qui de Unigéniti tui in nostra carne advéntu lætántur,

cum vénerit in sua maiestáte,

ætérnæ vitæ præmium consequántur.

Per Dóminum.

Ecclésiæ tuæ, Dómine, múnera placátus assúme,

quæ et miséricors offerénda tribuísti,

et in nostræ salútis poténter éfficis transíre mystérium.

Per Christum.

Beáta quæ credidísti,

quóniam perficiéntur ea quæ dicta sunt tibi a Dómino.

Sit plebi tuæ, Dómine, continuáta defénsio

divíni participátio mystérii,

ut, maiestáti tuæ plena devotióne subiécta,

salvatiónem mentis et córporis affluénter accípiat.

Per Christum.