Die 31 decembris
Feria VII infra octavam Nativitatis
Is 9, 6
Puer natus est nobis, et fílius datus est nobis,
cuius impérium super húmerum eius,
et vocábitur nomen eius magni consílii Angelus.
Omnípotens sempitérne Deus, qui in Fílii tui nativitáte
tribuísti totíus religiónis inítium perfectionémque constáre,
da nobis, quæsumus, in eius portióne censéri,
in quo totíus salútis humánæ summa consístit.
Qui tecum.
Deus, auctor sincéræ devotiónis et pacis,
da, quæsumus, ut et maiestátem tuam
conveniénter hoc múnere venerémur,
et sacri participatióne mystérii fidéliter sénsibus uniámur.
Per Christum.
Quando adhibetur Canon romanus, dicitur Communicántes proprium.
1 Io 4, 9
Misit Deus Fílium suum Unigénitum in mundum,
ut vivámus per eum.
Divérsis plebs tua, Dómine, gubernáta subsídiis,
et præséntia pietátis tuæ remédia cápiat et futúra,
ut, transeúntium rerum necessária consolatióne fovénte,
fiduciálius ad ætérna conténdat.
Per Christum.