Die 25 decembris
In Nativitate Domini
Ad Missam in nocte
In Nativitate Domini omnes sacerdotes tres Missas celebrare vel concelebrare possunt, dummodo hæ suo tempore celebrentur.
Ps 2, 7
Dóminus dixit ad me: Fílius meus es tu,
ego hódie génui te.
Gaudeámus omnes in Dómino,
quia Salvátor noster natus est in mundo.
Hódie nobis de cælo pax vera descéndit.
Deus, qui hanc sacratíssimam noctem
veri lúminis fecísti illustratióne claréscere,
da, quæsumus, ut, cuius in terra mystéria lucis agnóvimus,
eius quoque gáudiis perfruámur in cælo.
Qui tecum.
Grata tibi sit, Dómine, quæsumus,
hodiérnæ festivitátis oblátio,
ut, per hæc sacrosáncta commércia,
in illíus inveniámur forma,
in quo tecum est nostra substántia.
Qui vivit et regnat in sæcula sæculórum.
Præfatio: De Christo luce
Quando adhibetur Canon romanus, dicitur Communicántes proprium.
Io 1, 14
Verbum caro factum est, et vídimus glóriam eius.
Da nobis, quæsumus, Dómine Deus noster,
ut, qui nativitátem Redemptóris nostri
frequentáre gaudémus,
dignis conversatiónibus
ad eius mereámur perveníre consórtium.
Qui vivit et regnat in sæcula sæculórum.
BENEDICTIO SOLLEMNIS
FRA •
L/FDeus infinítæ bonitátis,
qui incarnatióne Fílii sui mundi ténebras effugávit,
et eius gloriósa nativitáte
hanc noctem sacratíssimam irradiávit,
effúget a vobis ténebras vitiórum,
et irrádiet corda vestra luce virtútum.
R. Amen.
Quique eius salutíferæ nativitátis gáudium magnum
pastóribus ab Angelo vóluit nuntiári,
ipse mentes vestras suo gáudio ímpleat,
et vos Evangélii sui núntios effíciat.
R. Amen.
Et, qui per eius incarnatiónem terréna cæléstibus sociávit,
dono vos suæ pacis et bonæ répleat voluntátis,
et vos fáciat Ecclésiæ consórtes esse cæléstis.
R. Amen.
Et benedíctio Dei omnipoténtis,
Patris, et Fílii, + et Spíritus Sancti,
descéndat super vos et máneat semper.
R. Amen.