Ad te levávi ánimam meam,

Deus meus, in te confído, non erubéscam.

Neque irrídeant me inimíci mei,

étenim univérsi qui te exspéctant non confundéntur.

Da, quæsumus, omnípotens Deus,

hanc tuis fidélibus voluntátem,

ut, Christo tuo veniénti iustis opéribus occurréntes,

eius déxteræ sociáti, regnum mereántur possidére cæléste.

Per Dóminum.

Súscipe, quæsumus, Dómine, múnera

quæ de tuis offérimus colláta benefíciis,

et, quod nostræ devotióni concédis éffici temporáli,

tuæ nobis fiat præmium redemptiónis ætérnæ.

Per Christum.

Dóminus dabit benignitátem,

et terra nostra dabit fructum suum.

Prosint nobis, quæsumus, Dómine, frequentáta mystéria,

quibus nos, inter prætereúntia ambulántes,

iam nunc instítuis amáre cæléstia et inhærére mansúris.

Per Christum.