Feria II - Hebd XIV
Tempus « per annum » - Anno secundo
Léctio libri Osée prophétæ 2, 16.17b-18.21-22
FRA •
L/F •
CMT
Hæc dicit Dominus:
« Ecce ego lactabo eam et ducam eam in solitudinem et loquar ad cor eius; et respondebit ibi iuxta dies iuventutis suæ et iuxta dies ascensionis suæ de terra Ægypti.
Et erit: in die illa, ait Dominus, vocabis me: “Vir meus” et non vocabis me ultra: “Baal meus”.
Et sponsabo te mihi in sempiternum; et sponsabo te mihi in iustitia et iudicio et in misericordia et miserationibus. Et sponsabo te mihi in fide, et cognosces Dominum ».
Psalmus responsorius 145(144), 2-3, 4-5, 6-7, 8-9
FRA •
L/F •
CMTR/ Miserátor et miséricors Dóminus.
Per singulos dies benedicam tibi
et laudabo nomen tuum
in sæculum et in sæculum sæculi.
Magnus Dominus et laudabilis nimis,
et magnitudinis eius non est investigatio.
Generatio generationi laudabit opera tua,
et potentiam tuam pronuntiabunt.
Magnificentiam gloriæ maiestatis tuæ loquentur
et mirabilia tua enarrabunt.
Et virtutem terribilium tuorum dicent
et magnitudinem tuam narrabunt.
Memoriam abundantiæ suavitatis tuæ eructabunt
et iustitia tua exsultabunt.
Miserator et misericors Dominus,
longanimis et multæ misericordiæ.
Suavis Dominus universis,
et miserationes eius super omnia opera eius.
Allelúia
Salvátor noster Iesus Christus destrúxit mortem, et illuminávit vitam per Evangélium.
Léctio sancti Evangélii secúndum Matthæum 9, 18-26
FRA •
L/F •
CMT
In illo tempore:
Loquente Iesu, ecce princeps unus accessit et adorabat eum dicens: « Filia mea modo defuncta est; sed veni, impone manum tuam super eam, et vivet ». Et surgens Iesus sequebatur eum et discipuli eius.
Et ecce mulier, quæ sanguinis fluxum patiebatur duodecim annis, accessit retro et tetigit fimbriam vestimenti eius. Dicebat enim intra se: « Si tetigero tantum vestimentum eius, salva ero ».
At Iesus conversus et videns eam dixit: « Confide, filia; fides tua te salvam fecit ». Et salva facta est mulier ex illa hora.
Et cum venisset Iesus in domum principis et vidisset tibicines et turbam tumultuantem, dicebat: « Recedite; non est enim mortua puella, sed dormit ». Et deridebant eum. At cum eiecta esset turba, intravit et tenuit manum eius, et surrexit puella. Et exiit fama hæc in universam terram illam.