Feria II - Hebd XVII
Tempus « per annum » - Anno secundo
Léctio libri Ieremiæ prophétæ 13, 1-11
FRA •
L/F •
CMT
Hæc dixit Dominus ad me: « Vade et posside tibi lumbare lineum et pones illud super lumbos tuos et in aquam non inferes illud ». Et possedi lumbare iuxta verbum Domini et posui circa lumbos meos.
Et factus est sermo Domini ad me secundo dicens: « Tolle lumbare, quod possedisti, quod est circa lumbos tuos, et surgens vade ad Euphraten et absconde ibi illud in foramine petræ ». Et abii et abscondi illud ad Euphraten, sicut præceperat mihi Dominus.
Et factum est, post dies plurimos dixit Dominus ad me: « Surge, vade ad Euphraten et tolle inde lumbare, quod præcepi tibi, ut absconderes ibi ». Et abii ad Euphraten et fodi et tuli lumbare de loco, ubi absconderam illud; et ecce, computruerat lumbare, ita ut nulli usui aptum esset.
Et factum est verbum Domini ad me dicens: « Hæc dicit Dominus: Sic putrescere faciam superbiam Iudæ et superbiam Ierusalem multam; populus iste pessimus — qui nolunt audire verba mea et ambulant in pravitate cordis sui abieruntque post deos alienos, ut servirent eis et adorarent eos — erit sicut lumbare istud, quod nulli usui aptum est. Sicut enim adhæret lumbare ad lumbos viri, sic agglutinavi mihi omnem domum Israel et omnem domum Iudæ, dicit Dominus, ut esset mihi in populum et in nomen et in laudem et in gloriam, et non audierunt ».
Psalmus responsorius : Liber Deuteronómii 32, 18-19, 20, 21
FRA •
L/F •
CMTR/ Deum qui te génuit dereliquísti.
Petram, quæ te genuit, dereliquisti,
et oblitus es Domini creatoris tui.
Vidit Dominus et sprevit,
quia provocaverunt eum filii sui et filiæ.
Et ait: “Abscondam faciem meam ab eis
et considerabo novissima eorum;
generatio enim perversa est, et infideles filii.
Ipsi me provocaverunt in eo, qui non erat Deus,
et irritaverunt in vanitatibus suis;
et ego provocabo eos in eo, qui non est populus,
et in gente stulta irritabo illos.
Allelúia
Voluntárie génuit nos Pater verbo veritátis, ut simus primítiæ quædam creatúræ eius.
Léctio sancti Evangélii secúndum Matthæum 13, 31-35
FRA •
L/F •
CMT
In illo tempore:
Aliam parabolam proposuit Iesus turbis dicens: « Simile est regnum cælorum grano sinapis, quod accipiens homo seminavit in agro suo. Quod minimum quidem est omnibus seminibus; cum autem creverit, maius est holeribus et fit arbor, ita ut volucres cæli veniant et habitent in ramis eius ».
Aliam parabolam locutus est eis: « Simile est regnum cælorum fermento, quod acceptum mulier abscondit in farinæ satis tribus, donec fermentatum est totum ».
Hæc omnia locutus est Iesus in parabolis ad turbas; et sine parabola nihil loquebatur eis, ut adimpleretur, quod dictum erat per prophetam dicentem: « Aperiam in parabolis os meum, eructabo abscondita a constitutione mundi ».