Feria VI - Hebd IX
Tempus « per annum » - Anno primo
In diebus illis:
Anna sedebat circumspiciens viam filii sui. Et cognovit illum venientem et dixit patri eius: « Ecce filius tuus venit et homo, qui cum illo ierat ».
Et Raphael dixit Thobiæ, antequam appropinquaret patri: « Scio quia oculi eius aperientur. Asperge fel piscis in oculis eius; et detrahet medicamentum et decoriabit albugines de oculis eius. Et respiciet pater tuus et videbit lumen ».
Et occurrit ei Anna et irruit collo filii sui et dixit illi: « Fili, video te; amodo moriar! ». Et lacrimata est.
Et surrexit Thobi et offendebat pedibus et egressus est ad ostium atrii. Et occurrit illi Thobias, et fel piscis in manu sua, et insufflavit in oculis illius et apprehendit illum et dixit: « Forti animo esto, pater! ». Et iniecit medicamentum super eum et imposuit. Et decoriavit duabus manibus suis albugines ab angulis oculorum illius.
Et videns filium suum irruit collo eius et lacrimatus est et dixit ei: « Video te, fili, lumen oculorum meorum! ». Et dixit: « Benedictus Deus, et benedictum nomen illius magnum, et benedicti omnes sancti angeli eius in omnia sæcula, quoniam ipse flagellavit me, et ecce ego video Thobiam filium meum! ».
Et introivit Thobi et Anna uxor eius in domum gaudentes et benedicentes Deum toto ore suo pro omnibus, quæ sibi evenerant. Et indicavit patri suo Thobias, quoniam perfecta erat via illius bene a Domino Deo, et quia attulerat pecuniam et quemadmodum acceperat Saram filiam Raguel uxorem, et quia ecce venit et ipsa in proximo est portæ Nineves. Et gavisi sunt Thobi et Anna et exierunt in obviam nurui suæ ad portam Nineves. Et videntes Thobin, qui erant in Nineve, venientem et ambulantem cum omni virtute sua et a nemine manu deductum mirabantur, et confitebatur Thobi et benedicebat magna voce Deum coram illis, quoniam misertus est illius Deus et aperuit oculos eius.
Et appropinquavit Thobi ad Saram uxorem Thobiæ filii sui et benedixit illi et dixit ei: « Intres sana, filia! Et benedictus Deus tuus, qui adduxit te ad nos, filia! Et benedictus pater tuus et benedictus Thobias filius meus et benedicta tu, filia! Intra in domum tuam sana in benedictione et gaudio; intra, filia! ».
In illo die factum est gaudium omnibus Iudæis, qui erant in Nineve.
Psalmus responsorius 146(145), 1.2, 6c-7, 8-9a, 9bc-10
FRA •
L/F •
CMTR/ Lauda, ánima mea, Dóminum!
vel
R/ Allelúia.
Lauda, anima mea, Dominum;
laudabo Dominum in vita mea,
psallam Deo meo, quamdiu fuero.
Qui custodit veritatem in sæculum,
facit iudicium oppressis,
dat escam esurientibus.
Dominus solvit compeditos.
Dominus illuminat cæcos,
Dominus erigit depressos,
Dominus diligit iustos,
Dominus custodit advenas.
Pupillum et viduam sustentat
et viam peccatorum disperdit.
Regnabit Dominus in sæcula,
Deus tuus, Sion,
in generationem et generationem.
Allelúia
Si quis díligit me, sermónem meum servábit, dicit Dóminus, et Pater meus díliget eum, et ad eum veniémus.
Léctio sancti Evangélii secúndum Marcum 12, 35-37
FRA •
L/F •
CMT
In illo tempore:
Respondens Iesus dicebat docens in templo: « Quomodo dicunt scribæ Christum filium esse David? Ipse David dixit in Spiritu Sancto:
«Dixit Dominus Domino meo: Sede a dextris meis, donec ponam inimicos tuos sub pedibus tuis».
Ipse David dicit eum Dominum, et unde est filius eius? ». Et multa turba eum libenter audiebat.