Feria V - Hebd quarta
Tempus paschale
Léctio Actuum Apostolórum 13, 13-25
FRA •
L/F •
CMT
Cum a Papho navigassent, qui erant cum Paulo, venerunt Pergen Pamphyliæ; Ioannes autem discedens ab eis reversus est Hierosolymam.
Illi vero pertranseuntes, a Perge venerunt Antiochiam Pisidiæ, et ingressi synagogam die sabbatorum sederunt. Post lectionem autem Legis et Prophetarum, miserunt principes synagogæ ad eos dicentes: « Viri fratres, si quis est in vobis sermo exhortationis ad plebem, dicite! ».
Surgens autem Paulus et manu silentium indicens ait:
« Viri Israelitæ et qui timetis Deum, audite. Deus plebis huius Israel elegit patres nostros et plebem exaltavit, cum essent incolæ in terra Ægypti, et in brachio excelso eduxit eos ex ea; et per quadraginta fere annorum tempus mores eorum sustinuit in deserto; et destruens gentes septem in terra Chanaan sorte distribuit terram eorum, quasi quadringentos et quinquaginta annos. Et post hæc dedit iudices usque ad Samuel prophetam.
Et exinde postulaverunt regem, et dedit illis Deus Saul filium Cis, virum de tribu Beniamin, annis quadraginta. Et amoto illo, suscitavit illis David in regem, cui et testimonium perhibens dixit: «Inveni David filium Iesse, virum secundum cor meum, qui faciet omnes voluntates meas».
Huius Deus ex semine secundum promissionem eduxit Israel salvatorem Iesum, prædicante Ioanne ante adventum eius baptismum pænitentiæ omni populo Israel. Cum impleret autem Ioannes cursum suum, dicebat: «Quid me arbitramini esse? Non sum ego; sed ecce venit post me, cuius non sum dignus calceamenta pedum solvere»” ».
Psalmus responsorius 89(88), 2-3, 21-22, 25.27
FRA •
L/F •
CMTR/ Misericórdias tuas, Dómine, in ætérnum cantábo.
vel
R/ Allelúia.
Misericordias Domini in æternum cantabo;
in generationem et generationem annuntiabo veritatem tuam in ore meo.
Quoniam dixisti: « In æternum misericordia ædificabitur »,
in cælis firmabitur veritas tua.
Inveni David servum meum;
oleo sancto meo unxi eum.
Manus enim mea firma erit cum eo,
et brachium meum confortabit eum.
Et veritas mea et misericordia mea cum ipso,
et in nomine meo exaltabitur cornu eius.
Ipse invocabit me: “Pater meus es tu,
Deus meus et refugium salutis meæ”.
Allelúia
Iesu Christe, testis es fidélis, primogénitus mortuórum, dilexísti nos, et lavásti peccáta nostra in sánguine tuo.
Léctio sancti Evangélii secúndum Ioánnem 13, 16-20
FRA •
L/F •
CMT
Postquam lavit Iesus pedes discipulorum, dixit eis:
« Amen, amen dico vobis: Non est servus maior domino suo, neque apostolus maior eo, qui misit illum. Si hæc scitis, beati estis, si facitis ea.
Non de omnibus vobis dico, ego scio, quos elegerim, sed ut impleatur Scriptura: «Qui manducat meum panem, levavit contra me calcaneum suum». Amodo dico vobis priusquam fiat, ut credatis, cum factum fuerit, quia ego sum.
Amen, amen dico vobis: Qui accipit, si quem misero, me accipit; qui autem me accipit, accipit eum, qui me misit ».