Dominica VII
Tempus paschale – Anno C
Léctio Actuum Apostolórum 7, 55-60
FRA •
L/F •
CMT
In diebus illis:
Cum esset Stephanum plenus Spiritu Sancto, intendens in cælum vidit gloriam Dei et Iesum stantem a dextris Dei et ait: « Ecce video cælos apertos et Filium hominis a dextris stantem Dei ».
Exclamantes autem voce magna continuerunt aures suas et impetum fecerunt unanimiter in eum et eicientes extra civitatem lapidabant. Et testes deposuerunt vestimenta sua secus pedes adulescentis, qui vocabatur Saulus. Et lapidabant Stephanum invocantem et dicentem: « Domine Iesu, suscipe spiritum meum ». Positis autem genibus clamavit voce magna: « Domine, ne statuas illis hoc peccatum »; et cum hoc dixisset, obdormivit.
Psalmus responsorius 97(96), 1.2b, 6.7c, 9
FRA •
L/F •
CMTR/ Dóminus regnávit, Altíssimus super omnem terram.
vel
R/ Allelúia.
Dominus regnavit! Exsultet terra,
lætentur insulæ multæ.
iustitia et iudicium firmamentum sedis eius.
Annuntiaverunt cæli iustitiam eius,
et viderunt omnes populi gloriam eius.
Adorate eum, omnes angeli eius.
Quoniam tu Dominus, Altissimus super omnem terram,
nimis exaltatus es super omnes deos.
Léctio libri Apocalýpsis beáti Ioánnis apóstoli 22, 12-14.16-17.20
FRA •
L/F •
CMT
Ego, Ioannes, audivi vocem dicentem mihi:
« Ecce venio cito, et merces mea mecum est, reddere unicuique sicut opus eius est. Ego Alpha et Omega, primus et novissimus, principium et finis. Beati, qui lavant stolas suas, ut sit potestas eorum super lignum vitæ, et per portas intrent in civitatem.
Ego Iesus misi angelum meum testificari vobis hæc super Ecclesiis. Ego sum radix et genus David, stella splendida matutina ».
Et Spiritus et sponsa dicunt: « Veni! ». Et, qui audit, dicat: « Veni! ». Et, qui sitit, veniat; qui vult, accipiat aquam vitæ gratis.
Dicit, qui testimonium perhibet istorum: « Etiam, venio cito ».
« Amen. Veni, Domine Iesu! ».
Allelúia
Non relínquam vos órphanos, dicit Dóminus; vado et vénio ad vos, et gaudébit cor vestrum.
Léctio sancti Evangélii secúndum Ioánnem 17, 20-26
FRA •
L/F •
CMT
In illo tempore: Sublevatis oculis suis in cælum, oravit Iesus dicens:
« [Pater sancte,] non pro his rogo tantum, sed et pro eis, qui credituri sunt per verbum eorum in me, ut omnes unum sint, sicut tu, Pater, in me et ego in te, ut et ipsi in nobis unum sint; ut mundus credat quia tu me misisti.
Et ego claritatem, quam dedisti mihi, dedi illis, ut sint unum, sicut nos unum sumus; ego in eis, et tu in me, ut sint consummati in unum; ut cognoscat mundus, quia tu me misisti et dilexisti eos, sicut me dilexisti.
Pater, quod dedisti mihi, volo, ut ubi ego sum, et illi sint mecum, ut videant claritatem meam, quam dedisti mihi, quia dilexisti me ante constitutionem mundi.
Pater iuste, et mundus te non cognovit; ego autem te cognovi, et hi cognoverunt quia tu me misisti; et notum feci eis nomen tuum et notum faciam, ut dilectio, qua dilexisti me, in ipsis sit, et ego in ipsis ».