O Ioseph, Virgo Pater Iesu
O Joseph, Virgin-Father of Jesus
O IOSEPH, virgo Pater Iesu, purissime Sponse Virginis Mariae, quotidie deprecare pro nobis ipsum Iesum Filium Dei, ut, armis suae gratiae muniti legitime certantes in vita, ab eodem coronemur in morte. Amen.
O Lux beata caelitum
O Highest Hope of Mortals
Written by Pope Leo XIII (1810-1903). This hymn is used for Vespers on the Feast of the Holy Family.
O LUX beata caelitum
et summa spes mortalium
Iesu, o cui domestica
arrisit orto caritas:
Maria, dives gratia,
o sola quae casto potes
fovere Iesum pectore,
cum lacte donans oscula:
Tuque ex vetustis partibus
delecte custos Virginis,
dulci patris quem nomine
divina Proles invocat:
De stirpe Iesse nobili
nati in salutem gentium,
audite nos, qui supplices
vestras ad aras sistimus.
Dum sol redux ad vesperum
rebus nitorem detrahit,
nos hic manentes intimo
ex corde vota fundimus.
Qua vestra sedes floruit
virtutis omnis gratia,
hanc detur in domesticis
referre posse moribus.
Iesu, tuis oboediens
qui factus es parentibus,
cum Patre summo ac Spiritu
semper tibi sit gloria.
From the Breviary and Liturgia Horarum. Translation from the Marquis of Bute's Breviary.
O lux beata Trinitas
O Trinity of Blessed Light
This hymn is ascribed to St. Ambrose (340-397) and is used for Sunday Vespers for the second and fourth weeks of the Psalter in the Liturgy of the Hours. The hymn appears in the Roman Breviary under the title of Iam sol recedit igneus, where it is the Vespers hymn for the ferial office on Saturdays and Trinity Sunday.
O LUX beata Trinitas,
et principalis Unitas,
iam sol recedit igneus,
infunde lumen cordibus.
Te mane laudum carmine,
te deprecemur vespere:
te nostra supplex gloria
per cuncta laudet saecula.
Deo Patri sit gloria,
eiusque soli Filio,
cum Spiritu Paraclito,
et nunc, et in perpetuum.
From the Liturgia Horarum. Translation by J. M. Neale (1818-1866).
O Maria sine labe concepta
O Mary, Conceived Without Sin
O MARIA sine labe concepta, ora pro nobis, qui confugimus ad te; O Refugium peccatorum, Mater agonizantium, noli nos derelinquere in hora exitus nostri, sed impetra nobis dolorem perfectum, sinceram contritionem, remissionem peccatorum nostrorum, sanctissimi Viatici dignam receptionem, Extremae Unctionis Sacramenti corroborationem, ut magis securi praesentari valeamus ante thronum iusti sed et misericordis Iudicis, Dei et Redemptoris nostri. Amen.
From the Raccolta #643, (Secretariat of Briefs, March 11, 1856; S. P. Ap., March 7, 1932).
O memoriale mortis Domini
O Memorial of my Savior Dying
The hymn below is used for Vespers for Holy Thursday, which is not said by those who participate in the evening Mass of the Last Supper. The hymn is an extract of St. Thomas Aquinas' (1225-1274) Adoro Te devote, which he composed in honor of the Blessed Sacrament.
O MEMORIALE mortis Domini!
panis vivus, vitam praestans homini!
praesta meae menti de te vivere
et te illi semper dulce sapere.
Pie pellicane, Iesu Domine,
me immundum munda tuo sanguine;
cuius una stilla salvum facere
totum mundum quit ab omni scelere.
Te cum revelata cernam facie,
visu tandem laetus tuae gloriae;
Patri, tibi laudes et Spiritui,
dicam beatorum iunctus coetui.
Amen.
O Omnium Domine
O Lord of All
By St. Gregory Nazianzen (329-389), Bishop and Doctor of the Church. This prayer is taken from the Office of the Readings for Friday of the 31st week of Ordinary time.
O OMNIUM Domine et effector ac praecipue huius figmenti!
O Deus tuorum hominum et Pater ac gubernator!
O vitae et mortis arbiter!
O nostrarum animarum custos et benefactor!
O QUI omnia facis, et tempestive, atque, ut ipse pro sapientiae tuae et administrationis altitudine nosti, artifice Verbo transmutas, nunc quidem Caesarium, discessus nostri primitias, quaeso, suscipe.
NOS vero quoque opportuno tempore suscipe, tamdiu in carne vitam nostram moderatus, quamdiu conducibile fuerit; et quidem suscipe ob metum tuum paratos et non turbatos, neque in extremo die terga vertentes atque invito animo, quemadmodum solent qui mundo et carni addicti sunt, hinc abstractos et avulsos, sed prompte et alacriter ad beatam illam et longaevam vitam proficiscentes, quae est in Christo Iesu Domino nostro, cui gloria in saecula saeculorum. Amen.
From the Roman Breviary, Office of the Readings, Friday, 31st week of Ordinary time. (Oratio 7, in laudem Caesarii fratris) (tr MWM).
O Pater misericordiarum
O Father of Mercies
O PATER misericordiarum, fons omnis boni, te supplex exoro per sacratissimum tuique amantissimum Cor Iesu dilectissimi Filii tui, Domini et Redemptoris nostri, in quo tibi semper bene complaces, dignare concedere mihi gratiam vivae fidei, firmae spei et ardentis caritatis erga te et proximum meum: insuper gratiam vere dolendi de omnibus peccatis meis una cum firmissimo proposito te in posterum numquam offendendi; ut secundum divinum beneplacitum tuum semper vivere, voluntatem tuam sanctissimam corde magno et animo volenti in omnibus adimplere, et in amore tuo usque ad finem vitae meae perseverare valeam. Amen.
From the Raccolta #65 (S. C. Ind. April 21, 1818; S. P. Ap., March 23, 1936).
O Princeps caelestis militiae
O Prince of the Heavenly Host
O PRINCEPS caelestis militiae, sancte Michael, qui superbum Luciferum cum omnibus suis asseclis in tartarum deiecisti, o defensor et protector Ecclesiae, o animarum ex hoc saeculo migrantium praeses: succurre populo Dei, defende Ecclesiam tibi commendatam contra omnes insidias satanae; adiuva animam meam contra eundem hostem constitutam, quam tibi nunc commendo. Praesertim me in hora mortis meae protege, ut ad paradisi gaudia admittar, ubi cum omnibus Angelis Deum aeternis laudibus depraedicem. Amen.
Latin from Orate Fratres!, 1901. Tr. MWM
O Pura et Immaculata
O Pure and Immaculate
Written by St. Ephrem the Syrian (306-373). St. Ephrem is especially noted for his Marian Hymns which are an important source of Catholic Dogma. Pope Benedict XV officially declared him a Doctor of the Church in 1920.
O PURA et immaculata, eademque benedicta Virgo, magni Filii tui universorum Domini Mater inculpata, integra et sacrosanctissima, desperantium atque reorum spes, te collaudamus. Tibi ut gratia plenissimae benedicimus, quae Christum genuisti Deum et Hominem: omnes coram te prosternimur: omnes te invocamus et auxilium tuum imploramus. Eripe nos, o Virgo sancta atque intemerata, a quacumque ingruente necessitate et a cunctis tentationibus diaboli.
Nostra conciliatrix et advocata in hora mortis atque iudicii esto: nosque a futuro inexstinguibili igne et a tenebris exterioribus libera: et Filii tui nos gloria dignare, o Virgo et Mater dulcissima ac clementissima. Tu siquidem unica spes nostra es securissima et sanctissima apud Deum, cui gloria et honor, decus atque imperium in sempiterna saecula saeculorum. Amen.
From the Raccolta #371.
O Sacratissimum Cor Iesu
O Most Sacred Heart of Jesus
O SACRATISSIMUM Cor Iesu, Tu beatae Margaritae Mariae desiderium regnandi super christianas familias pandisti1: ecce ut tibi placeamus adsumus hodie, ut plenum tuum super nostram familiam imperium proclamemus. Volumus deinceps tuam vitam vivere, volumus in sinu familiae nostrae florere virtutes, quibus Tu in terris pacem promisisti, volumus longe arcere a nobis spiritum mundi, quem Tu damnasti. Tu regnabis in mente nostra fidei nostrae simplicitate, in corde nostro tui solius amore, quo flagrabit erga te et cuius vivam servabimus flammam frequenti divinae Eucharistiae receptione. Dignare, Cor divinum, nobis praeesse in unum convenientibus, benedicere negotiis spiritualibus et temporalibus, arcere molestias, sanctificare gaudia, poenas levare. Si quando misere quis nostrum in tantum aerumnam inciderit ut te affligat, fac in memoriam illi redigas, Cor Iesu, te cum peccatore, quem paenitet, plenum esse bonitatis et misericordiae. Et quum hora separationis insonuerit et mors in familiae nostrae sinum luctum intulerit, nos omnes, sive abeuntes sive manentes, tuis aeternis decretis nos subiiciemus. Hoc solatio erit nobis, animo recogitare venturum esse diem, in quo familia nostra, in caelo coniuncta, tuam gloriam, tua beneficia in aeternum cantare poterit. Dignetur Cor immaculatum Mariae, dignetur gloriosus Patriarcha sanctus Ioseph tibi hanc consecrationem offerre, eiusque vivam in nobis singulis diebus vitae nostrae conservare memoriam. Vivat Cor Iesu, Regis et Patris nostri! Amen.
From the Raccolta #705.
1 The 1957 edition of the Raccolta has pandidisti here.
O Sacrum Convivium
O Sacred Banquet
O Sacrum Convivium is a traditional prayer honoring the Blessed Sacrament. What appears below is more than just O Sacrum Convivium. The prayer has been appended here with a response and final prayer making it a fit meditation of the Eucharistic mystery. A partial indulgence is attached to O Sacrum Convivium itself.
O SACRUM convivium, in quo Christus sumitur: recolitur memoria passionis eius; mens impletur gratia et futurae gloriae nobis pignus datur.
V. Panem de caelo praestitisti eis;
R. Omne delectamentum in se habentem.
Oremus; Deus, qui nobis sub Sacramento mirabili Passionis tuae memoriam reliquisti; tribue, quaesumus, ita nos Corporis et Sanguinis tui sacra mysteria venerari, ut redemptionis tuae fructum in nobis iugiter sentiamus: Qui vivis et regnas in saecula saeculorum. Amen.
Tempore paschali sequens dicitur oratio:
Oremus; Spiritum nobis, Domine tuae caritatis infunde, ut, quos Sacramentis paschalibus satiasti, tua facias pietate concordes. Per Dominum nostrum Iesum Christum Filium tuum, qui tecum vivit et regnat in unitate eiusdem Spiritus Sancti Deus per omnia saecula saeculorum. Amen.
From the Raccolta # 180. (S. P. Ap., June 4, 1934, July 12, 1941, & Sept. 29, 1949). From the Roman Missal.
O Salutaris Hostia
O Saving Victim
O Salutaris Hostia is from the last two verses of Verbum Supernum, one of the five Eucharistic Hymns written by St. Thomas Aquinas (1225-1274) at the request of Pope Urban IV (1261-1264) when the Pope first instituted the Feast of Corpus Christi in 1264. The prayer is still used today, often at exposition of the Blessed Sacrament.
O SALUTARIS Hostia
Quae caeli pandis ostium.
Bella premunt hostilia;
Da robur, fer auxilium.
Uni trinoque Domino
Sit sempiterna gloria:
Qui vitam sine termino,
Nobis donet in patria.
Amen.
O Sancte Spiritus
O Holy Spirit
O SANCTE SPIRITUS, qui sollemni Pentecostes die repente per dispertitas linguas tamquam ignis in Apostolos descendens, intra cenaculum congregatos, ita eorum mentes illuminasti, eorum animos incendisti, eorumque voluntates roborasti, ut inde per universum mundum proficiscerentur et ubicumque animose fidenterque Iesu Christi doctrinam annuntiarent, eamque suo profuso cruore obsignarent, renova, quaesumus, in animas quoque nostras prodigiales gratiae tuae effusiones.
Quanta mentes nostrae ignorantia laborant circa naturam gravitatemque divinarum veritatum, quae obiectum fidei efficiunt, sine qua salutem nemini sperare licet. Quot aberrationes a iusta terrenorum bonorum aestimatione, quae saepius animae ipsimet anteponuntur. Quam saepe corda nostra non, ut debent, Creatoris amore palpitant, sed ignobiliter creaturarum cupidine. Quam saepe falso humani iudicii respectu impellimur, cum debemus Iesu Christi praecepta palam profiteri, eaque sincere et cum rerum etiam iactura in vitae usum deducere. Quanta infirmitas in amplectenda ferendaque sereno libentique animo huius vitae cruce, quae christianum solummodo potest divini Magistri sui discipulum dignum efficere.
O Sancte Spiritus, mentes nostras illumina, corda nostra purifica, voluntatesque nostra redintegra; ita quidem ut infinitum animae nostrae pretium plane cognoscamus, itemque peritura huius mundi bona pro nihilo habeamus; ut Deum supra res omnes adamemus, eiusque amore proximos, quemadmodum nosmetipsos, diligamus; ut fidem nostram non modo palam demonstrare ne timeamus, sed de eadem potius gloriemur; ut denique non tantum res prosperas sed res etiam adversas quasi de manu Domini accipiamus, confisi prorsus omnia Eum in eorum bonum esse conversurum, qui erga Eum amore ferantur. Fac, quaesumus, ut nos, suavibus gratiae tuae impulsionibus constanter respondentes ac perseveranti animo operantes bonum, amplissimam sempiternae gloriae messem aliquando accipere mereamur. Amen.
From the Raccolta #291 (S. P. Ap., May 31, 1941).
Iam, Christe, sol iustitiae
Now Christ, Thou Sun of Righteousness
From the 10th century, though some feel it is Ambrosian from the 6th century. This hymn is traditionally used for the ferial offices for Lauds during the weeks of Lent before Holy Week. The revsion of 1632 altered the hymn extensively with the title of the hymn becoming O Sol salutis, initimis.
IAM, Christe, sol iustitiae,
mentis dehiscant tenebrae,
virtutum ut lux redeat,
terris diem cum reparas.
Dans tempus acceptabile
et paenitens cor tribue,
convertat ut benignitas
quos longa suffert pietas.
Quiddamque paenitentiae
da ferre, quo fit demptio,
maiore tuo munere,
culparum quamvis grandium.
Dies venit, dies tua,
per quam reflorent omnia;
laetemur in hac ut tuae
per hanc reducti gratiae.
Te rerum universitas,
clemens, adoret, Trinitas,
et nos novi per veniam
novum canamus canticum.
Amen.
From the Liturgia Horarum. Translation from the Primer of 1706 and ascribed to John Dryden (1631 - 1701).
Changes made by Pope Urban VIII in 1632 to the Roman Breviary:1 O Sol salutis, initimis/ Iesu, refulge mentibus,/ dum nocte pulsa, gratior/ orbi dies renascitur.
2 Dans tempus acceptabile,/ da lacrimarum rivulis/ lavare cordis victimam,/ quam laeta adurat caritas.
3 Quo fonte manavit nefas,/ fluent perennes lacrimae,/ si virga paenitentiae/ cordis rigorem conterat.
4 Dies venit, dies tua,/ in qua reflorent omnia:/ laetemur et nos in viam/ tua reducti dextera.
5 Te prona mundi machina,/ clemens, adoret, Trinitas,/ et nos novi per gratiam/ novum canamus canticum.
O sola magnarum urbium
Bethlehem, of Noblest Cities
This hymn is composed of four verses from the Hymn for the Epiphany from Prudentius' (384-413) Cathemerinon, which is 52 stanzas long. In 1568, four short hymns were assembled from selected stanzas from Prudentius' hymn and introduced into the Breviary by Pope Pius V. This hymn is one of them and is used in the Roman Breviary at Lauds on Epiphany.
O SOLA magnarum urbium
maior Bethlehem, cui contigit
ducem salutis caelitus
incorporatum gignere.
Haec stella, quae solis rotam
vincit decore ac lumine,
venisse terris nuntiat
cum carne terrestri Deum.
Videre postquam illum Magi,
eoa promunt munera:
stratique votis offerunt
thus, myrrham, et aurum regium.
Regem Deumque annuntiant
thesaurus, et fragrans odor
thuris Sabaei, ac myrrheus
pulvis sepulchrum praedocet.
Iesu, tibi sit gloria,
qui apparuisti gentibus,
cum Patre, et almo Spiritu,
in sempiterna saecula.
From the Roman Breviary. Translation by Fr. Edward Caswall (1814-1878).
O Virgo et Mater Sanctissima
Most Holy Virgin and Mother
O VIRGO et Mater sanctissima, cuius animam in divini Filii tui passione doloris gladius pertransivit, et quae in gloriosa eius resurrectione perennem triumphantis laetitiam percepisti; impetra nobis supplicibus tuis, ita sanctae Ecclesiae adversitatibus Summique Pontificis doloribus consociari, ut optatis etiam consolationibus laetificari cum ipsis mereamur, in caritate et pace eiusdem Christi Domini nostri. Amen.
From the Raccolta #385. (Pius X, Rescript in his own hand, Jan. 25, 1906).
Oblatio Sui
Prayer of Self-Dedication to Jesus Christ
From the Roman Missal, by St. Ignatius of Loyola (1491 - 1556), founder of the Jesuits.
SUSCIPE, Domine, universam meam libertatem. Accipe memoriam, intellectum atque voluntatem omnem. Quidquid habeo vel possideo mihi largitus es; id tibi totum restituo, ac tuae prorsus voluntati trado gubernandum. Amorem tui solum cum gratia tua mihi dones, et dives sum satis, nec aliud quidquam ultra posco. Amen
Obsecro te
This prayer was a favorite during the later part of the Middle Ages and invariably appeared in Books of the Hours from the 15th century and onwards. Books of the Hours were prayer books intended for the laity and were based upon the much longer Liturgy of the Hours recited by clergy and religious. Often these books would contain three sets of Hours; the Hours of the Blessed Virgin, the Hours of the Cross, and the Hours of the Holy Spirit. In addition to the Hours, a number of other prayers and popular devotions were often included such as this one and the
O Intemerata. The text of the prayer below is taken from a 15th century edition.
OBSECRO te, Domina Sancta Maria, Mater Dei, pietate plenissima, summi regis filia, Mater gloriosissima, Mater orphanorum, consolatio desolatorum, via errantium, salus et spes in te sperantium, Virgo ante partum, Virgo in partu, et Virgo post partum, fons misericordiae, fons salutis et gratiae, fons pietatis et laetitiae, fons consolationis et indulgentiae, et per illam sanctam ineffabilem laetitiam qua exultavit spiritus tuus in illa hora quando tibi per Gabrielem Archangelum annuntiatus et conceptus Filius Dei fuit, et per illud divinum mysterium quod tunc operatus est Spiritus Sanctus, et per illam sanctam ineffabilem gratiam, pietatem, misericordiam, amorem, et humilitatem per quas Filius Dei descendit humanam carnem accipere in venerabilissimo utero tuo, et in quibus te respexit quando te commendavit sancto Ioanne apostolo et evangelista, et quando te exaltavit super choros angelorum, et per illam sanctam ineffabilem humilitatem qua respondisti Archangelo Gabrieli, "Ecce ancilla Domini. Fiat mihi secundum verbum tuum."
Et per gloriosissima quindecim gaudia quae habuisti de Filio tuo Domino nostro Iesu Christo, et per illam sanctam maximam compassionem et acerbissimum cordis dolorem quem habuisti quando Dominum nostrum Iesum Christum ante crucem nudatum et in ipsa levatum vidisti, pendentem, crucifixum, vulneratum, sitientem fel apponi, clamantem audisti et morientem vidisti.
Et per quinque vulnera Filii tui, et per contractionem viscerum suorum prae nimio dolore vulnerum, et per dolorem quem habuisti quando vidisti eum vulnerari, et per fontes sanguinis sui et per omnem passionem eius et per omnem dolorem cordis tui, et per fontes lacrimarum tuarum et cum omnibus sanctis et electis Dei.
Venias et festines in auxilium et consilium meum. In omnibus orationibus et requisitis meis. Et in omnibus angustiis et in necessitatibus meis et in omnibus rebus illis in quibus ego sum facturus, locuturus, aut cogitaturus omnibus diebus ac noctibus, horis, atque momentis vitae meae. Et in famulo tuo impetres a dilecto Filio complementum omni misericordia et consolatione, omni consilio, omni auxilio et omni adiutorio, omni benedictione et sanctificatione, omni salvatione, pace et prosperitate, omni gaudio et alacritate, etiam abundantiam omnium bonorum spiritualium et corporalium et gratiam Spiritus Sancti qui me bene per omnia disponat, animam meam custodiat, corpus regat, sensus erigat, mores componat, actus probet, vota et desideria mea proficiat, cogitationes sanctas instituat, praeterita mala indulgeat, praesentia emendet, futura moderetur, vitam honestam et honorabilem mihi tribuat. Et victoriam contra omnes adversitates huius mundi, beatam pacem spiritualem et corporalem mihi tribuat. Bonam spem, caritatem fidem castitatem humilitatem et patientiam. Et quinque sensus corporis mei regat et protegat, septem opera misericordiae complere me faciat, duodecim articulos fidei1 et decem praecepta legis firmiter credere et tenere me faciat. Et a septem peccatis mortalibus me liberet et defendat usque in finem vitae meae.
Et in novissimis diebus meis ostende mihi faciem tuam. Et annunties mihi dies et hora obitus mei. Et hanc orationem meam supplicem suscipias et exaudias. Et vitam aeternam mihi tribuas. Audi et exaudi me dulcissime Virgo Maria, Mater Dei et misericordiae. Amen.
1 The 12 articles are the twelve statements of the Apostle's Creed.
Tr MWM.
Obsecro te, angelice spiritus
I Beseech Thee, Angelic Spirit
From the Antidotarius animae of Nicolas Salicetus, Cistercian abbot of Bomgart (near Strasbourg), late 15th century.
OBSECRO te, angelice spiritus, cui ego ad providendum commissus sum: ut custodias me indesinenter, protegas, visites, et defendas ab omni incursu diaboli. Vigilantem atque dormientem, nocte ac die, horis continuis atque momentis confove me. Ubicumque iero, comitare mecum. Repelle a me per virtutem Dei omnem tentationem satanae: et quod mea non exigunt merita tuis precibus obtine apud misericordissimum iudicem, ut nihil in me habeat locum contrariae virtutis admixtio. Cumque me per abrupta vitiorum de via esse videris, per semitas iustitiae incedendo ad redemptorem meum reducere satagas et, in quacumque necessitate vel in quacumque angustia me esse perspexeris, auxilium Dei omnipotentis tuo obtentu super me adesse sentiam.
Precor te custos meus ut si fieri possit notum mihi facias finem meum. Et, cum de hoc corpore ductus fuero, non dimittas malignos spiritus terrere me aut illudere, neque in foveam desperationis inducere. Et non derelinquas me, iubente Deo, donec ad visionem conditoris mei perducas, in qua simul et ego pro opere et tu pro custodia mea una cum beatissima Dei genetrice sanctisque angelis et omnibus sanctis perenniter laetemur. Amen.
Latin from Wilmart, p 542. TR MWM.
Obsecro te, dulcissime Domine Iesu Christe
I Beseech Thee, Most Sweet Lord Jesus Christ
From the Roman Missal.
OBSECRO te, dulcissime Domine Iesu Christe, ut passio tua sit mihi virtus, qua muniar, protegar, atque defendar. Vulnera tua sint mihi cibus potusque, quibus pascar inebrier atque delecter. Aspersio Sanguinis tui sit mihi ablutio omnium delictorum meorum. Mors tua sit mihi vita indeficiens, crux sit mihi gloria sempiterna. In his sit mihi refectio, exsultatio, sanitas et dulcedo cordis mei: Qui vivis et regnas in saecula saeculorum. Amen.
Octo Beatitudines
The Eight Beatitudes
From the Sermon on the Mount, Mt 5. See also the CCC 1716.
Beati pauperes spiritu, quoniam ipsorum est Regnum caelorum.
Beati, qui lugent, quoniam ipsi consolabuntur.
Beati mites, quoniam ipsi possidebunt terram.
Beati, qui esuriunt et sitiunt iustitiam, quoniam ipsi saturabuntur.
Beati misericordes, quia ipsi misericordiam consequentur.
Beati mundo corde, quoniam ipsi Deum videbunt.
Beati pacifici, quoniam filii Dei vocabuntur.
Beati, qui persecutionem patiuntur propter iustitiam, quoniam ipsorum est Regnum caelorum.
Officium parvum Conceptionis Immaculatae
Little Office of the Immaculate Conception
Ad Matutinum
Eia, mea labia, nunc annuntiate, laudes et praeconia Virginis beatae.
Ad Completorium
V. Convertat nos, Domina, tuis precibus placatur Iesus Christus Filius tuus.
R. Et avertat iram suam a nobis.
Ad Horas Omnes
V. DOMINA, in adiutorium meum intende.
R. Me de manu hostium potenter defende.
V. Gloria Patri, et Filio, et Spiritui Sancto. R. Sicut erat in principio, et nunc, et semper, et in saecula saeculorum. Alleluia*.
*A Septuagesima usque ad Pascha, loco Alleluia, dicitur:
Laus tibi, Domine, Rex aeternae gloriae.
Ad Matutinum
SALVE, mundi Domina,
caelorum Regina:
Salve, Virgo virginum,
stella matutina
Salve, plena gratia,
clara luce divina.
Mundi in auxilium,
Domina, festina.
Ab aeterno Dominus
te praeordinavit
matrem unigeniti
Verbi, quo creavit.
Terram, pontum, aethera,
te pulchram ornavit
sibi Sponsam, quae
in Adam non peccavit.
Amen.
V. Elegit eam Deus, et praeelegit eam.
R. In tabernaculo suo habitare fecit eam.
Ad Primam
SALVE, Virgo sapiens,
domus Deo dicata,
columna septemplici
mensaque exornata.
Ab omni contagio
mundi praeservata.
Semper sancta in utero
matris, ex qua nata.
Tu Mater viventium,
et porta es sanctorum.
Nova stella Iacob,
Domina angelorum.
Zabulo terribilis
acies castrorum.
Porta et refugium
sis Christianorum.
Amen.
V. Ipse creavit illam in Spiritu Sancto.
R. Et effundit illam super omnia opera sua.
Ad Tertiam
SALVE, arca foederis,
thronus Salomonis,
arcus pulcher aetheris,
rubus visionis.
Virga frondens germinis,vellus Gedeonis,
porta clausa numinis,
favusque Samsonis.
Decebat tam nobilem
natum praecavere
ab originali
labe matris Evae.
Almam, quam elegerat,
Genetricem vere,
nulli prorsus sinens
culpae subiacere.
Amen.
V. Ego in altissimis habito.
R. Et thronus meus in columna nubis.
Ad Sextam
SALVE, Virgo puerpera,
templum Trinitatis,
angelorum gaudium,
cella puritatis.
Solamen moerentium,
hortus voluptatis,
palma patientiae
cedrus castitatis.
Terra es benedicta
et sacerdotalis,
sancta et immunis
culpae originalis.
Civitas altissimi,
porta orientalis:
in te est omnis gratia,
Virgo singularis.
Amen.
V. Sicut lilium inter spinas
R. Sic amica mea inter filias Adae.
Ad Nonam
SALVE, urbs refugii,
turrisque munita
David, propugnaculis
armisque insignita.
In conceptione
caritate ignita
draconis potestas
est a te contrita.
O mulier fortis,
et invicta Iudith!
Pulchra Abisag virgo
verum fovens David!
Rachel curatorem
Aegypti gestavit:
Salvatorem mundi
Maria portavit.
Amen.
V. Tota pulchra es, amica mea.
R. Et macula originalis numquam fuit in te.
Ad Vesperas
SALVE, horologium,
quo, retrogradiatur
sol in decem lineis;
Verbum incarnatur.
Homo ut ab inferis
ad summa attollatur,
immensus ab angelis
paulo minoratur.
Solis huius radiis
Maria coruscat;
consurgens aurora
in conceptu micat.
Lilium inter spinas
quae serpentis conterat
caput: pulchra ut luna
errantes collustrat.
Amen.
V. Ego feci in caelis ut oriretur lumen indeficiens.
R. Et quasi nebula texi omnem terram.
Ad Completorium
SALVE, virgo florens,
mater illibata,
regina clementiae,
stellis coronata.
Super omnes angelos
pura, immaculata,
atque ad regis dexteram
stans veste deaurata.
Per te, mater gratiae,
dulcis spes reorum,
fulgens stella maris,
portus naufragorum.
Patens caeli ianua
salus infirmorum
videamus regem
in aula sanctorum.
Amen.
V. Oleum effusum, Maria, nomen tuum.
R. Servi tui dilexerunt te nimis.
V. Domina, protege orationem meam.
R. Et clamor meus ad te veniat.
Oremus
Sancta Maria, Regina caelorum, Mater Domini nostri Iesu Christi, et mundi Domina, quae nullum derelinquis, et nullum despicis: respice me, Domina, clementer oculo pietatis, et impetra mihi apud tuum dilectum Filium cunctorum veniam peccatorum: ut qui nunc tuam sanctam et immaculatam conceptionem devoto affectu recolo, aeternae in futurum beatitudinis, bravium capiam, ipso, quem virgo peperisti, donante Domino nostro Iesu Christo: qui cum Patre et Sancto Spiritu vivit et regnat, in Trinitate1 perfecta, Deus, in saecula saeculorum. Amen.
V. Domina, protege orationem meam.
R. Et clamor meus ad te veniat.
V. Benedicamus Domino.
R. Deo gratias.
V. Fidelium animae per misericordiam Dei requiescant in pace.
R. Amen.
Ad Commendationem
SUPPLICES offerimus
tibi, virgo pia,
haec laudum praeconia:
Fac nos ut in via
Ducas cursu prospero,
et in agonia
tu nobis assiste,
O dulcis Maria.
R. Deo gratias.
Ant. Haec est virga in qua nec nodus originalis, nec cortex actualis culpae fuit.
V. In conceptione tua virgo immaculata fuisti.
R. Ora pro nobis Patrem, cuius Filium peperisti.
Oremus
Deus, qui per immaculatam Virginis conceptionem dignum Filio tuo habitaculum praeparasti: quaesumus, ut qui ex morte eiusdem Filii tui praevisa eam ab omni labe praeservasti, nos quoque mundos eius intercessione ad te pervenire concedas. Per eundem Christum Dominum nostrum. Amen.
1 Some texts show "unitate".