Ecce iam séquitur Agnum pro nobis crucifíxum

strénua virgo, pudóris hóstia,

víctima castitátis (T.P. allelúia).

Beáta virgo, quæ ábnegans semetípsam

et tollens crucem suam,

Dóminum æmuláta est, vírginum sponsum

martyrúmque príncipem (T.P. allelúia).

Deus, qui nos hódie

beátæ N. ánnua commemoratióne lætíficas,

concéde propítius, ut eius adiuvémur méritis,

cuius castitátis et fortitúdinis irradiámur exémplis.

Per Dóminum.

Múnera, quæsumus, Dómine,

quæ in celebritáte beátæ N. deférimus,

ita grátiæ tuæ efficiántur accépta,

sicut eius tibi plácitum éxstitit passiónis certámen.

Per Christum.

Agnus, qui in médio throni est,

dedúcet eos ad vitæ fontes aquárum (T.P. allelúia).

Deus, qui beátam N.

pro gémina virginitátis et martýrii victória

inter Sanctos coronásti,

da, quæsumus, per huius virtútem sacraménti,

ut, omne malum fórtiter superántes,

cæléstem glóriam consequámur.

Per Christum.