Dicit Dóminus: Sermónes mei,

quos dedi in os tuum,

non defícient de ore tuo,

et múnera tua accépta erunt super altáre meum

(T.P. allelúia).

Omnípotens et miséricors Deus,

qui beáti N. prædicatióne

patres nostros illumináre dignátus es,

concéde nobis, quæsumus,

ut, qui christiáno gloriámur nómine,

fidem quam profitémur iúgiter opéribus ostendámus.

Per Dóminum.

Réspice, Dómine, famíliam tuam,

quam beátus N. (epíscopus) génuit verbo veritátis,

et vitæ áluit sacraménto,

ut, quos grátia tua fecit illíus ministério fidéles,

fáciat eiúsdem précibus in caritáte fervéntes.

Per Dóminum.

Annue, quæsumus, omnípotens Deus,

ut hæc sacrifícia pópuli tui,

quæ tibi in commemoratióne beáti N. offérimus,

donis cæléstibus propitiátus immísceas.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Quia sic tríbuis Ecclésiam tuam sancti N. festivitáte gaudére,

ut eam exémplo piæ conversatiónis corróbores,

verbo prædicatiónis erúdias,

gratáque tibi supplicatióne tueáris.

Et ídeo, cum Angelórum atque Sanctórum turba,

hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Fílius hóminis venit, ut daret ánimam suam

redemptiónem pro multis

(T.P. allelúia).

Fundaméntum áliud nemo potest pónere,

præter id quod pósitum est,

quod est Christus Iesus

(T.P. allelúia).

Súmpsimus, Dómine,

pignus redemptiónis ætérnæ,

beáti N. festivitáte lætántes,

quod sit nobis, quæsumus,

vitæ præséntis auxílium páriter et futúræ.

Per Christum.