Annuntiáte inter gentes glóriam Dómini,

in ómnibus pópulis mirabília eius,

quóniam magnus Dóminus et laudábilis nimis (T.P. allelúia).

Deus, cuius ineffábili misericórdia

beátus N. evangelizávit investigábiles divítias Christi,

da nos, eius intercessióne, créscere in sciéntia tua,

et, in omni ópere bono fructificántes,

secúndum Evangélii veritátem coram te fidéliter ambuláre.

Per Dóminum.

Beáti N. memóriam recenséntes, quæsumus, Dómine,

ut his munéribus tibi oblátis benedictiónem effúndas de cælis,

quo, ex eis suméntes, et ómnibus careámus culpis

et cæléstibus repleámur edúliis.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Quia sic tríbuis Ecclésiam tuam sancti N. festivitáte gaudére,

ut eam exémplo piæ conversatiónis corróbores,

verbo prædicatiónis erúdias,

gratáque tibi supplicatióne tueáris.

Et ídeo, cum Angelórum atque Sanctórum turba,

hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Misit Dóminus discípulos, qui nuntiárent civitátibus:

Appropinquávit in vos regnum Dei (T.P. allelúia).

Semen quod cécidit in terram bonam.

hi sunt, qui in corde bono et óptimo

fructum áfferunt in patiéntia (T.P. allelúia).

Sancta tua nos, Dómine, sumpta vivíficent,

ut, qui beáti N. commemoratióne gaudémus,

eius quoque apostólicæ virtútis proficiámus exémplo.

Per Christum.