Quam pulchri super montes

pedes annuntiántis et prædicántis pacem,

annuntiántis bonum, prædicántis salútem (T.P. allelúia)!

Deus, qui Ecclésiam tuam

beáti N. religiónis zelo et apostólicis curis amplificásti,

eius intercessióne concéde,

ut fídei et sanctitátis nova semper increménta suscípiat.

Per Dóminum.

Propitiáre, Dómine, supplicatiónibus nostris,

et nos ab omni culpa líberos esse concéde,

ut, purificánte grátia tua,

iísdem quibus famulámur mystériis emundémur.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

per Christum Dóminum nostrum.

Quia sic tríbuis Ecclésiam tuam sancti N. festivitáte gaudére,

ut eam exémplo piæ conversatiónis corróbores,

verbo prædicatiónis erúdias,

gratáque tibi supplicatióne tueáris.

Et ídeo, cum Angelórum atque Sanctórum turba,

hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Eúntes in mundum univérsum, prædicáte Evangélium:

ego vobíscum sum ómnibus diébus,

dicit Dóminus (T.P. allelúia).

Manéte in me, et ego in vobis, dicit Dóminus.

Qui manet in me et ego in eo,

hic fert fructum multum (T.P. allelúia).

Sacraménta quæ súmpsimus, Dómine Deus noster,

illam nobis fidem innútriant,

quam et apostólica dócuit prædicátio,

et beáti N. sollicitúdo custodívit.

Per Christum.