Sínite párvulos veníre ad me, et ne prohibuéritis eos:

tálium est enim regnum Dei, dicit Dóminus (T.P. allelúia).

Qui fécerit et docúerit mandáta Dómini,

hic magnus vocábitur in regno cælórum, dicit Dóminus

(T.P. allelúia).

Deus, qui in Ecclésia tua beátum N. suscitásti,

ut próximis viam salútis monstráret,

da nobis, eius exémplo, Christum magístrum ita sequi,

ut ad te cum frátribus nostris perveníre valeámus.

Per Dóminum.

Accépta tibi sit, quæsumus, Dómine, sacrátæ plebis oblátio

pro beáti commemoratióne et præsta,

ut, ex huius participatióne mystérii,

exémpla tuæ caritátis referámus.

Per Christum.

Nisi convérsi fuéritis et efficiámini sicut párvuli,

non intrábitis in regnum cælórum, dicit Dóminus

(T.P. allelúia).

Qui séquitur me, non ámbulat in ténebris,

sed habébit lumen vitæ, dicit Dóminus (T.P. allelúia).

Tríbuat nobis, omnípotens Deus, reféctio sancta subsídium,

ut, exémplo beáti N.,

et fraternitátis caritátem et lumen veritátis

in corde exhibeámus et ópere.

Per Christum.