Deus, fidélis remunerátor animárum,

præsta, ut defúnctus fámulus tuus Papa N.,

quem Petri constituísti successórem

et Ecclésiæ tuæ pastórem,

grátiæ et miseratiónis tuæ mystériis,

quæ fidénter dispensávit in terris,

lætánter apud te perpétuo fruátur in cælis.

Per Dóminum.

Quæsumus, Dómine, ut, per hæc piæ placatiónis offícia,

ánimam fámuli tui Papæ N. beáta retribútio comitétur,

et misericórdia tua nobis grátiæ dona concíliet.

Per Christum.

Divínæ tuæ communiónis refécti sacraméntis,

quæsumus, Dómine,

ut fámulus tuus Papa N., quem Ecclésiæ tuæ

visíbile voluísti fundaméntum unitátis in terris,

beatitúdini gregis tui felíciter aggregétur.

Per Christum.