MISSA PRO PAPA
Præsertim in anniversario electionis. Hæc Missa dicitur, cum colore albo, in anniversario electionis Papæ, ubi peculiares habentur celebrationes, dummodo non occurrat dominica Adventus, Quadragesimæ et Paschæ, aut sollemnitas, aut feria IV Cinerum vel Hebdomadæ sanctæ.
Mt 16, 18-19
Tu es Petrus, et super hanc petram
ædificábo Ecclésiam meam,
et portæ ínferi non prævalébunt advérsus eam,
et tibi dabo claves regni cælórum.
Deus, qui providéntiæ tuæ consílio
super beátum Petrum, céteris Apóstolis præpósitum,
Ecclésiam tuam ædificári voluísti,
réspice propítius ad Papam nostrum N.,
et concéde, ut, quem Petri constituísti successórem,
pópulo tuo visíbile sit unitátis fídei et communiónis
princípium et fundaméntum.
Per Dóminum.
Vel:
Deus, ómnium fidélium pastor et rector,
fámulum tuum N., quem pastórem
Ecclésiæ tuæ præésse voluísti, propítius réspice;
da ei, quæsumus, verbo et exémplo,
quibus præest profícere,
ut ad vitam, una cum grege sibi crédito,
pervéniat sempitérnam.
Per Dóminum.
Vel:
Deus, qui in apóstoli Petri successióne
fámulum tuum N. elegísti totíus gregis esse pastórem,
supplicántem pópulum intuére propítius, et præsta,
ut, qui Christi vices gerit in terris, fratres confírmet,
et omnis Ecclésia cum ipso commúnicet
in vínculo unitátis, amóris et pacis,
quátenus in te, animárum pastóre,
omnes veritátem et vitam assequántur ætérnam.
Per Dóminum.
Oblátis, quæsumus, Dómine, placáre munéribus,
et Ecclésiam tuam sanctam,
una cum Papa nostro N., quem ipsi constituísti pastórem,
assídua protectióne gubérna.
Per Christum.
Io 21, 15.17
Simon Ioánnis, díligis me plus his?
Dómine, tu ómnia nosti; tu scis, Dómine, quia amo te.
Mensæ cæléstis partícipes effécti,
súpplices te, Dómine, deprecámur,
ut, huius virtúte mystérii,
Ecclésiam tuam in unitáte et caritáte confírmes,
et fámulum tuum N., cui pastorále munus tradidísti,
una cum commísso sibi grege salves semper et múnias.
Per Christum.