Tota formósa et suávis es, Fília Sion, pulchra ut luna, elécta ut sol, in muliéribus benedícta.

Intercédat pro nobis, Dómine, gloriósa Virgo María, quæ, Sancti Spíritus decoráta munéribus, tibi plácuit nobísque génuit Unigénitum tuum, speciósum præ fíliis hóminum, ut, a foeditáte peccáti abhorréntes, spiritális pulchritúdinis amatóres efficiámur. Per Dóminum.

Dicátæ tibi, Dómine, quæsumus, capiámus oblatiónis efféctum, ut, cum beáta Vírgine viam pulchritúdinis percurréntes, cæléstis vitæ proféctibus innovémur et ad tuam glóriam contemplándam perveníre mereámur. Per Christum.

Vere dignum et iustum est, æquum et salutáre, nos tibi, sancte Pater, semper et ubíque grátias ágere, et in hac festivitáte beátæ Vírginis Maríæ, te débitis magnificáre præcóniis.

 

Illa pulchra fuit in conceptióne, qua, ab omni peccáti labe immúnis, decóra renídet grátiæ fulgóre; pulchra in partu virgináli, quo Fílium, splendórem glóriæ tuæ, mundo prótulit ómnium nostrum salvatórem et fratrem; pulchra in Fílii passióne, eius purpuráta cruóre, mitis agna mitíssimo Agno compátiens, novo matris ornáta múnere; pulchra in Christi resurrectióne, cum quo regnat gloriósa, eius victóriæ consors effécta.

 

Per quem maiestátem tuam adórat exércitus Angelórum, ante conspéctum tuum in æternitáte lætántium. Cum quibus et nostras voces ut admítti iúbeas, deprecámur, sócia exsultatióne dicéntes:

 

Sanctus, Sanctus, Sanctus Dóminus Deus Sábaoth.

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Non est talis múlier super terram in aspéctu, et in pul chritúdine, et in sensu verbórum.

Perpétuo, Dómine, favóre proséquere, quos réficis divíno mystério, et, quibus beátam Vírginem Matrem dedísti speciósam ornaménto virtútum, concéde per sémitas iustítiæ iúgiter ambuláre. Per Christum.