Hæc est virgo sápiens, et una de número prudéntum,

quæ óbviam Christo cum lámpade accénsa éxiit, allelúia.

Deus, qui beátam Catharínam

in contemplatióne domínicæ passiónis

et in Ecclésiæ tuæ servítio

divíno amóre flagráre fecísti,

ipsíus intercessióne concéde,

ut pópulus tuus, Christi mystério sociátus,

in eius glóriæ revelatióne semper exsúltet. Qui tecum.

Súscipe, Dómine,

quam in beátæ Catharínæ commemoratióne

offérimus hóstiam salutárem,

ut, illíus mónitis erudíti,

tibi vero Deo fervéntius grátias ágere valeámus.

Per Christum.

Si in luce ambulámus, sicut Deus est in luce,

societátem habémus ad ínvicem,

et sanguis Iesu Christi, Fílii eius,

emúndat nos ab omni peccáto, allelúia.

Æternitátem nobis, Dómine, cónferat,

qua pasti sumus, mensa cæléstis,

quæ beátæ Catharínæ vitam étiam áluit temporálem.

Per Christum.