Cum iucunditáte

Nativitátem beátæ Maríæ Vírginis celebrémus,

ex qua ortus est sol iustítiæ, Christus Deus noster.

Fámulis tuis, quæsumus, Dómine,

cæléstis grátiæ munus impertíre,

ut, quibus beátæ Vírginis partus éxstitit salútis exórdium,

Nativitátis eius festívitas pacis tríbuat increméntum.

Per Dóminum.

Nativitátem beátæ Vírginis Maríæ cum gáudio recoléntes,

tibi, Dómine, múnera nostra deférimus,

et súpplices deprecámur,

ut Fílii tui nobis succúrrat humánitas,

qui ex eádem Vírgine carnem dignátus est suscípere.

Qui vivit et regnat in sæcula sæculórum.

Ecce Virgo páriet Fílium,

qui salvum fáciet pópulum suum a peccátis eórum.

Exsúltet Ecclésia tua, Dómine,

quam sacris mystériis refecísti,

de beátæ Maríæ Vírginis Nativitáte congáudens,

quæ univérso mundo spes fuit et auróra salútis.

Per Christum.