Eúntes, docéte omnes gentes, baptizántes eos,

et docéntes eos serváre ómnia quæcúmque mandávi vobis,

dicit Dóminus.

Deus, qui ineffábili misericórdia beátum Matthæum

ex publicáno Apóstolum es dignátus elígere,

da nobis, eius exémplo et intercessióne suffúltis,

ut, te sequéntes, tibi fírmiter adhærére mereámur.

Per Dóminum.

Memóriam beáti Matthæi recenséntes,

preces et hóstias tibi, Dómine, deférimus,

supplíciter exorántes, ut Ecclésiam tuam benígnus aspícias,

cuius fidem Apostolórum prædicatiónibus nutrivísti.

Per Christum.

Non veni vocáre iustos, sed peccatóres, dicit Dóminus.

Salutáris gáudii partícipes, Dómine,

quo lætus Salvatórem in domo sua convívam

beátus Matthæus excépit,

da, ut cibo semper reficiámur illíus,

qui non iustos sed peccatóres vocáre venit ad salútem.

Qui vivit et regnat in sæcula sæculórum.