Gaudens gaudébo in Dómino,

et exsultábit ánima mea in Deo meo;

quia índuit me vestiméntis salútis,

et induménto iustítiæ circúmdedit me,

quasi sponsam ornátam monílibus suis.

Deus, qui per immaculátam Vírginis Conceptiónem

dignum Fílio tuo habitáculum præparásti,

quæsumus, ut, qui ex morte eiúsdem Fílii tui prævísa,

eam ab omni labe præservásti,

nos quoque mundos, eius intercessióne,

ad te perveníre concédas.

Per Dóminum.

Salutárem hóstiam,

quam in sollemnitáte immaculátæ Conceptiónis

beátæ Vírginis Maríæ tibi, Dómine, offérimus,

súscipe dignánter, et præsta,

ut, sicut illam tua grátia præveniénte

ab omni labe profitémur immúnem,

ita, eius intercessióne, a culpis ómnibus liberémur.

Per Christum.

Vere dignum et iustum est, æquum et salutáre,

nos tibi semper et ubíque grátias ágere:

Dómine, sancte Pater, omnípotens ætérne Deus:

Qui beatíssimam Vírginem Maríam

ab omni originális culpæ labe præservásti,

ut in ea, grátiæ tuæ plenitúdine ditáta,

dignam Fílio tuo Genetrícem præparáres,

et Sponsæ eius Ecclésiæ,

sine ruga vel mácula formósæ, signáres exórdium.

qui crímina nostra Agnus ínnocens aboléret;

et ipsam præ ómnibus tuo pópulo disponébas

advocátam grátiæ et sanctitátis exémplar.

Et ídeo, choris angélicis sociáti,

te laudámus in gáudio confiténtes:

Pleni sunt cæli et terra glória tua.

Hosánna in excélsis.

Benedíctus qui venit in nómine Dómini.

Hosánna in excélsis.

Gloriósa dicta sunt de te, María,

quia ex te ortus est sol iustítiæ,

Christus Deus noster.

Sacraménta quæ súmpsimus,

Dómine Deus noster,

illíus in nobis culpæ vúlnera réparent,

a qua immaculátam beátæ Maríæ Conceptiónem

singuláriter præservásti.

Per Christum.