Apértæ sunt iánuæ cæli beáto Stéphano,

qui in número Mártyrum invéntus est primus,

et ídeo triúmphat in cælis coronátus.

Da nobis, quæsumus, Dómine, imitári quod cólimus,

ut discámus et inimícos dilígere,

quia eius natalícia celebrámus,

qui novit étiam pro persecutóribus exoráre.

Per Dóminum.

Múnera, quæsumus, Dómine,

tibi sint hodiérnæ devotiónis accépta,

quæ beáti Stéphani mártyris

commemorátio gloriósa deprómit.

Per Christum.

Lapidábant Stéphanum, invocántem et dicéntem:

Dómine Iesu, súscipe spíritum meum.

Grátias ágimus, Dómine,

multiplicátis circa nos miseratiónibus tuis,

qui et Fílii tui nativitáte nos salvas,

et beáti mártyris Stéphani celebratióne lætíficas.

Per Christum.