Die 1 ianuarii
SOLEMNITAS SANCTÆ DEI GENETRICIS MARIÆ
Solemnitas
Salve, sancta Parens, eníxa puérpera Regem,
qui cælum terrámque regit in sæcula sæculórum.
Cf. Is 9, 2.6; Lc 1, 33
Lux fulgébit hódie super nos, quia natus est nobis Dóminus;
et vocábitur admirábilis, Deus, Princeps pacis,
Pater futúri sæculi: cuius regni non erit finis.
Deus, qui salútis ætérnæ,
beátæ Maríæ virginitáte fecúnda,
humáno géneri præmia præstitísti, tríbue, quæsumus,
ut ipsam pro nobis intercédere sentiámus,
per quam merúimus Fílium tuum auctórem vitæ suscípere.
Qui tecum.
Deus, qui bona cuncta ínchoas benígnus et pérficis,
da nobis, de sollemnitáte sanctæ Dei Genetrícis lætántibus,
sicut de inítiis tuæ grátiæ gloriámur
ita de perfectióne gaudére.
Per Christum.
Præfatio: De maternitate beatæ Mariæ Virginis :
Quando adhibetur Canon romanus, dicitur Communicántes proprium.
Hebr 13, 8
Iesus Christus heri et hódie, ipse et in sæcula.
Súmpsimus, Dómine, læti sacraménta cæléstia:
præsta, quæsumus,
ut ad vitam nobis profíciant sempitérnam,
qui beátam semper Vírginem Maríam
Fílii tui Genetrícem et Ecclésiæ Matrem
profitéri gloriámur.
Per Christum.
BENEDICTIO SOLLEMNIS
FRA •
L/FDeus, fons et orígo totíus benedictiónis,
grátiam vobis concédat,
benedictiónis suæ largitátem infúndat,
atque per totum annum vos salvos et incólumes prótegat.
R. Amen.
Custódiat fídei vobis integritátem,
tríbuat spei longanimitátem,
perseverántem usque ad finem
cum sancta patiéntia caritátem.
R. Amen.
Dies et actus vestros in sua pace dispónat,
preces hic et ubíque exáudiat,
et ad vitam ætérnam felíciter vos perdúcat.
R. Amen.
Et benedíctio Dei omnipoténtis,
Patris, et Fílii, + et Spíritus Sancti,
descéndat super vos et máneat semper.
R. Amen.
Diebus sequentibus, quando dicenda est Missa de feria, adhibentur textus infra propositi