Die 1 ianuarii
SOLEMNITAS SANCTÆ DEI GENETRICIS MARIÆ
Solemnitas
Locutusque est Dominus ad Moysen dicens: « Loquere Aaron et filiis eius: Sic benedicetis filiis Israel et dicetis eis:
"Benedicat tibi Dominus et custodiat te! Illuminet Dominus faciem suam super te et misereatur tui! Convertat Dominus vultum suum ad te et det tibi pacem!".
Invocabuntque nomen meum super filios Israel, et ego benedicam eis ».
Psalmus responsorius 67(66), 2-3, 5, 6.8
FRA •
L/F •
CMTR/ Deus misereátur nostri et benedícat nobis.
Deus misereatur nostri et benedicat nobis;
illuminet vultum suum super nos.
Ut cognoscatur in terra via tua,
in omnibus gentibus salutare tuum.
Lætentur et exsultent gentes,
quoniam iudicas populos in æquitate
et gentes in terra dirigis.
Confiteantur tibi populi, Deus;
confiteantur tibi populi omnes.
Benedicat nos Deus,
et metuant eum omnes fines terræ.
Léctio Epístolæ béati Pauli apóstoli ad Gálatas 4, 4-7
FRA •
L/F •
CMT
Fratres:
Ubi venit plenitudo temporis, misit Deus Filium suum, factum ex muliere, factum sub lege, ut eos, qui sub lege erant, redimeret, ut adoptionem filiorum reciperemus. Quoniam autem estis filii, misit Deus Spiritum Filii sui in corda nostra clamantem: « Abba, Pater! ». Itaque iam non es servus sed filius; quod si filius, et heres per Deum.
Allelúia
Multifáriam olim Deus locútus pátribus in prophétis, in novíssimis his diébus locútus est nobis in Fílio.
Léctio sancti Evangélii secúndum Lucam 2, 16-21
FRA •
L/F •
CMT
In illo tempore:
Venerunt pastores festinantes usque Bethleem, et invenerunt Mariam et Ioseph et infantem positum in præsepio.
Videntes autem notum fecerunt verbum, quod dictum erat illis de puero hoc. Et omnes, qui audierunt, mirati sunt de his, quæ dicta erant a pastoribus ad ipsos. Maria autem conservabat omnia verba hæc conferens in corde suo.
Et reversi sunt pastores glorificantes et laudantes Deum in omnibus, quæ audierant et viderant, sicut dictum est ad illos.
Et postquam consummati sunt dies octo, ut circumcideretur, vocatum est nomen eius Iesus, quod vocatum est ab angelo, priusquam in utero conciperetur.