Pópulus Sion, ecce Dóminus véniet ad salvándas gentes;

et audítam fáciet Dóminus glóriam vocis suæ in lætítia

cordis vestri.

Omnípotens et miséricors Deus,

in tui occúrsum Fílii festinántes

nulla ópera terréni actus impédiant,

sed sapiéntiæ cæléstis erudítio nos fáciat eius esse consórtes.

Qui tecum.

Placáre, Dómine, quæsumus,

nostræ précibus humilitátis et hóstiis,

et, ubi nulla súppetunt suffrágia meritórum,

tuæ nobis indulgéntiæ succúrre præsídiis.

Per Christum.

Ierúsalem, surge et sta in excélso,

et vide iucunditátem, quæ véniet tibi a Deo tuo.

Repléti cibo spiritális alimóniæ,

súpplices te, Dómine, deprecámur,

ut, huius participatióne mystérii,

dóceas nos terréna sapiénter perpéndere,

et cæléstibus inhærére.

Per Christum.