Ecce Deus ádiuvat me,

et Dóminus suscéptor est ánimæ meæ.

Voluntárie sacrificábo tibi,

et confitébor nómini tuo, Dómine, quóniam bonum est.

Propitiáre, Dómine, fámulis tuis,

et clémenter grátiæ tuæ super eos dona multíplica,

ut, spe, fide et caritáte fervéntes,

semper in mandátis tuis vígili custódia persevérent.

Per Dóminum.

Deus, qui legálium differéntiam hostiárum

uníus sacrifícii perfectióne sanxísti,

áccipe sacrifícium a devótis tibi fámulis,

et pari benedictióne, sicut múnera Abel, sanctífica,

ut, quod sínguli obtulérunt ad maiestátis tuæ honórem,

cunctis profíciat ad salútem.

Per Christum.

Memóriam fecit mirabílium suórum

miséricors et miserátor Dóminus;

escam dedit timéntibus se.

Ecce sto ad óstium et pulso, dicit Dóminus:

si quis audíerit vocem meam, et aperúerit mihi iánuam,

intrábo ad illum, et cenábo cum illo, et ipse mecum.

Pópulo tuo, quæsumus, Dómine, adésto propítius,

et, quem mystériis cæléstibus imbuísti,

fac ad novitátem vitæ de vetustáte transíre.

Per Christum.