Factus est Dóminus protéctor meus,

et edúxit me in latitúdinem,

salvum me fecit, quóniam vóluit me.

Da nobis, quæsumus, Dómine,

ut et mundi cursus pacífico nobis tuo órdine dirigátur,

et Ecclésia tua tranquílla devotióne lætétur.

Per Dóminum.

Deus, qui offerénda tuo nómini tríbuis,

et obláta devotióni nostræ servitútis ascríbis,

quæsumus cleméntiam tuam,

ut, quod præstas unde sit méritum,

profícere nobis largiáris ad præmium.

Per Christum.

Cantábo Dómino, qui bona tríbuit mihi,

et psallam nómini Dómini Altíssimi.

Ecce ego vobíscum sum ómnibus diébus,

usque ad consummatiónem sæculi, dicit Dóminus.

Satiáti múnere salutári,

tuam, Dómine, misericórdiam deprecámur,

ut, hoc eódem quo nos temporáliter végetas sacraménto,

perpétuæ vitæ partícipes benígnus effícias.

Per Christum.