Deus, dum egrederéris coram pópulo tuo,

iter fáciens eis, hábitans in illis,

terra mota est, cæli distillavérunt, allelúia.

Deus, qui pro salúte mundi sacrifícium paschále effecísti,

propitiáre supplicatiónibus pópuli tui,

ut interpéllans pro nobis Christus Póntifex noster,

nos per id quod nostri est símilis reconcíliet,

per id quod tibi est æquális absólvat.

Per Dóminum.

Ascéndant ad te, Dómine,

preces nostræ cum oblatiónibus hostiárum,

ut, tua dignatióne mundáti,

sacraméntis magnæ pietátis aptémur.

Per Christum.

Ecce ego vobíscum sum ómnibus diébus,

usque ad consummatiónem sæculi, allelúia.

Omnípotens sempitérne Deus,

qui ad ætérnam vitam

in Christi resurrectióne nos réparas,

fructus in nobis paschális multíplica sacraménti,

et fortitúdinem cibi salutáris nostris infúnde pectóribus.

Per Christum.