Die 24 iunii
IN NATIVITATE S. IOANNIS BAPTISTÆ
Ad Missam in vigilia
Solemnitas
Léctio libri Ieremíæ prophétæ 1, 4-10
FRA •
L/F •
CMT
In diebus Iosiæ:
Factum est verbum Domini ad me dicens: « Priusquam te formarem in utero, novi te et, antequam exires de vulva, sanctificavi te et prophetam gentibus dedi te ».
Et dixi: « Heu, Domine Deus! Ecce nescio loqui, quia puer ego sum ».
Et dixit Dominus ad me: « Noli dicere: “Puer sum”, quoniam, ad quoscumque mittam te, ibis et universa, quæcumque mandavero tibi, loqueris. Ne timeas a facie eorum, quia tecum ego sum, ut eruam te », dicit Dominus.
Et misit Dominus manum suam et tetigit os meum; et dixit Dominus ad me: « Ecce dedi verba mea in ore tuo; ecce constitui te hodie super gentes et super regna, ut evellas et destruas et disperdas et dissipes et ædifices et plantes ».
Psalmus responsorius 71(70), 1-2, 3-4a, 5-6ab, 15ab.17
FRA •
L/F •
CMTR/ De ventre matris meæ tu es suscéptor meus.
In te, Domine, speravi,
non confundar in æternum.
In iustitia tua libera me et eripe me;
inclina ad me aurem tuam et salva me.
Esto mihi in rupem præsidii
et in domum munitam, ut salvum me facias,
quoniam fortitudo mea et refugium meum es tu.
Deus meus, eripe me de manu peccatoris.
Quoniam tu es exspectatio mea, Domine;
Domine, spes mea a iuventute mea.
Super te innixus sum ex utero,
de ventre matris meæ tu es susceptor meus.
Os meum annuntiabit iustitiam tuam,
tota die salutare tuum:
Deus, docuisti me a iuventute mea;
et usque nunc annuntiabo mirabilia tua.
Léctio Epístolæ primæ beáti Petri apóstoli 1, 8-12
FRA •
L/F •
CMT
Carissimi:
Cum Iesum Christum non videritis, diligitis; in quem nunc non videntes, credentes autem, exsultatis lætitia inenarrabili et glorificata, reportantes finem fidei vestræ salutem animarum.
De qua salute exquisierunt atque scrutati sunt prophetæ, qui de futura in vos gratia prophetaverunt, scrutantes in quod vel quale tempus significaret, qui erat in eis Spiritus Christi, prænuntians eas, quæ in Christo sunt, passiones et posteriores glorias; quibus revelatum est quia non sibi ipsis, vobis autem ministrabant ea, quæ nunc nuntiata sunt vobis per eos, qui evangelizaverunt vos, Spiritu Sancto misso de cælo, in quæ desiderant angeli prospicere.
Allelúia
Hic venit ut testimónium perhíberit de lúmine; ut paráret Deo plebem perféctam.
Léctio sancti Evangélii secúndum Lucam 1, 5-17
FRA •
L/F
Fuit in diebus Herodis regis Iudææ sacerdos quidam nomine Zacharias de vice Abiæ, et uxor illi de filiabus Aaron, et nomen eius Elisabeth. Erant autem iusti ambo ante Deum, incedentes in omnibus mandatis et iustificationibus Domini, irreprehensibiles. Et non erat illis filius, eo quod esset Elisabeth sterilis, et ambo processissent in diebus suis.
Factum est autem, cum sacerdotio fungeretur in ordine vicis suæ ante Deum, secundum consuetudinem sacerdotii sorte exiit, ut incensum poneret ingressus in templum Domini; et omnis multitudo erat populi orans foris hora incensi.
Apparuit autem illi angelus Domini stans a dextris altaris incensi; et Zacharias turbatus est videns, et timor irruit super eum. Ait autem ad illum angelus: « Ne timeas, Zacharia, quoniam exaudita est deprecatio tua, et uxor tua Elisabeth pariet tibi filium, et vocabis nomen eius Ioannem. Et erit gaudium tibi et exsultatio, et multi in nativitate eius gaudebunt: erit enim magnus coram Domino et vinum et siceram non bibet et Spiritu Sancto replebitur adhuc ex utero matris suæ et multos filiorum Israel convertet ad Dominum Deum ipsorum. Et ipse præcedet ante illum in spiritu et virtute Eliæ, ut convertat corda patrum in filios et incredibiles ad prudentiam iustorum, parare Domino plebem perfectam ».