In Baptismate Domini
Tempus Nativitatis - Anno A
Léctio libri Isaíæ prophétæ 42, 1-4.6-7
FRA •
L/F •
CMT
Ecce servus meus, suscipiam eum; electus meus, complacet sibi in illo anima mea; dedi spiritum meum super eum, iudicium gentibus proferet. Non clamabit neque vociferabitur, nec audietur vox eius foris. Calamum quassatum non conteret et linum fumigans non exstinguet; in veritatem proferet iudicium. Non languebit nec frangetur, donec ponat in terra iudicium; et legem eius insulæ exspectant.
Ego, Dominus, vocavi te in iustitia et apprehendi manum tuam; et formavi te et dedi te in fœdus populi, in lucem gentium, ut aperires oculos cæcorum et educeres de conclusione vinctum, de domo carceris sedentes in tenebris.
Psalmus responsorius 29(28), 1a-2, 3ac-4, 3b.9b.10
FRA •
L/F •
CMTR/ Dóminus benedícet pópulo suo in pace.
Afferte Domino, filii Dei,
afferte Domino gloriam nominis eius,
adorate Dominum in splendore sancto.
Vox Domini super aquas;
Dominus super aquas multas.
Vox Domini in virtute,
vox Domini in magnificentia.
Deus maiestatis intonuit;
et in templo eius omnes dicent gloriam.
Dominus super diluvium habitat,
et sedebit Dominus rex in æternum.
Léctio Actuum Apostolórum 10, 34-38
FRA •
L/F •
CMT
In diebus illis:
Aperiens Petrus os dixit: « In veritate comperio quoniam non est personarum acceptor Deus, sed in omni gente, qui timet eum et operatur iustitiam, acceptus est illi.
Verbum misit filiis Israel evangelizans pacem per Iesum Christum; hic est omnium Dominus. Vos scitis quod factum est verbum per universam Iudæam incipiens a Galilæa post baptismum, quod prædicavit Ioannes: Iesum a Nazareth, quomodo unxit eum Deus Spiritu Sancto et virtute, qui pertransivit benefaciendo et sanando omnes oppressos a Diabolo, quoniam Deus erat cum illo ».
Allelúia
Cæli apérti sunt et vox Patris intónuit: « Hic est Fílius meus diléctus ; audíte illum ».
Léctio sancti Evangélii secúndum Matthæum 3, 13-17
FRA •
L/F •
CMT
In illo tempore:
Venit Iesus a Galilæa in Iordanem ad Ioannem, ut baptizaretur ab eo. Ioannes autem prohibebat eum dicens: « Ego a te debeo baptizari, et tu venis ad me? ».
Respondens autem Iesus dixit ei: « Sine modo, sic enim decet nos implere omnem iustitiam ». Tunc dimittit eum.
Baptizatus autem Iesus, confestim ascendit de aqua; et ecce aperti sunt ei cæli, et vidit Spiritum Dei descendentem sicut columbam et venientem super se. Et ecce vox de cælis dicens: «Hic est Filius meus dilectus, in quo mihi complacui ».