Feria V - Hebd I
Adventus
Léctio libri Isaíæ prophétæ 26, 1-6
FRA •
L/F •
CMT
In die illa cantabitur canticum istud in terra Iudæ:
« Urbs fortis nobis in salutem; posuit muros et antemurale. Aperite portas, et ingrediatur gens iusta, quæ servat fidem. Propositum eius est firmum; servabis pacem, quia in te speravit.
Sperate in Dominum in sæculis æternis, Dominus est petra æterna. Quia evertit habitantes in excelso, civitatem sublimem humiliabit; humiliabit eam usque ad terram, detrahet eam usque ad pulverem. Conculcabit eam pes, pedes pauperis, gressus egenorum ».
Psalmus responsorius 118(117), 1.8-9, 19-21, 25-27a
FRA •
L/F •
CMTR/ Benedíctus qui venit in nómine Dómini.
Confitemini Domino, quoniam bonus,
quoniam in sæculum misericordia eius.
Bonum est confugere ad Dominum
quam confidere in homine.
Bonum est confugere ad Dominum
quam confidere in principibus.
Aperite mihi portas iustitiæ;
ingressus in eas confitebor Domino;
hæc porta Domini, iusti intrabunt in eam.
Confitebor tibi, quoniam exaudisti me,
et factus es mihi in salutem.
O Domine, salvum me fac;
o Domine, da prosperitatem!
Benedictus, qui venit in nomine Domini.
Benedicimus vobis de domo Domini.
Deus Dominus et illuxit nobis.
Allelúia
Quærite Dóminum, dum inveníri potest; invocáte eum, dum propre est.
Léctio sancti Evangélii secúndum Matthæum 7, 21.24-27
FRA •
L/F •
CMT
In illo tempore: Dixit Iesus discipulis suis:
« Non omnis, qui dicit mihi: «Domine, Domine», intrabit in regnum cælorum, sed qui facit voluntatem Patris mei, qui in cælis est.
Omnis ergo, qui audit verba mea hæc et facit ea, assimilabitur viro sapienti, qui ædificavit domum suam supra petram. Et descendit pluvia, et venerunt flumina, et flaverunt venti et irruerunt in domum illam, et non cecidit; fundata enim erat supra petram.
Et omnis, qui audit verba mea hæc et non facit ea, similis erit viro stulto, qui ædificavit domum suam supra arenam. Et descendit pluvia, et venerunt flumina, et flaverunt venti et irruerunt in domum illam, et cecidit, et fuit ruina eius magna ».