Dominica I
Tempus quadragesimæ - Anno C
Léctio libri Deuteronómii 26, 4-10
FRA •
L/F •
CMT
Locutus est Moyses populo dicens:
Suscipiens sacerdos cartallum de manu tua ponet ante altare Domini Dei tui, et loqueris in conspectu Domini Dei tui:
“Syrus vagus erat pater meus et descendit in Ægyptum et ibi peregrinatus est in paucissimo numero; crevitque in gentem magnam ac robustam et infinitæ multitudinis.
Afflixeruntque nos Ægyptii et persecuti sunt imponentes onera gravissima. Et clamavimus ad Dominum, Deum patrum nostrorum, qui exaudivit nos et respexit humilitatem nostram et laborem atque angustias, et eduxit nos Dominus de Ægypto in manu forti et brachio extento, in ingenti pavore, in signis atque portentis, et introduxit ad locum istum et tradidit nobis terram hanc lacte et melle manantem.
Et ecce nunc attuli primitias frugum terræ, quam dedisti mihi, Domine”.
Et dimittes eas in conspectu Domini Dei tui et adorato Domino Deo tuo ».
Psalmus responsorius 91(90), 1-2, 10-11, 12-13, 14-15
FRA •
L/F •
CMTR/ Esto mecum, Dómine, in tribulatióne.
Qui habitat in protectione Altissimi,
sub umbra Omnipotentis commorabitur.
Dicet Domino: « Refugium meum
et fortitudo mea, Deus meus, sperabo in eum ».
Non accedet ad te malum,
et flagellum non appropinquabit tabernaculo tuo.
Quoniam angelis suis mandabit de te,
ut custodiant te in omnibus viis tuis.
In manibus portabunt te,
ne forte offendas ad lapidem pedem tuum.
Super aspidem et basiliscum ambulabis,
et conculcabis leonem et draconem.
Quoniam mihi adhæsit, liberabo eum;
suscipiam eum, quoniam cognovit nomen meum.
Clamabit ad me, et ego exaudiam eum;
cum ipso sum in tribulatione,
eripiam eum et glorificabo eum.
Léctio Epístolæ béati Pauli apóstoli ad Romános 10, 8-13
FRA •
L/F •
CMT
Fratres:
Quid dicit Scriptura? « Prope te est verbum, in ore tuo et in corde tuo »; hoc est verbum fidei, quod prædicamus. Quia si confitearis in ore tuo: « Dominum Iesum! », et in corde tuo credideris quod Deus illum excitavit ex mortuis, salvus eris. Corde enim creditur ad iustitiam, ore autem confessio fit in salutem. Dicit enim Scriptura: « Omnis, qui credit in illo, non confundetur ».
Non enim est distinctio Iudæi et Græci, nam idem Dominus omnium, dives in omnes, qui invocant illum: Omnis enim, quicumque invocaverit nomen Domini, salvus erit.
Non in pane solo vivet homo, sed in omni verbo quod procédit de ore Dei.
Léctio sancti Evangélii secúndum Lucam 4, 1-13
FRA •
L/F •
CMT
In illo tempore:
Iesus plenus Spiritu Sancto regressus est ab Iordane et agebatur in Spiritu in deserto diebus quadraginta et tentabatur a Diabolo. Et nihil manducavit in diebus illis et, consummatis illis, esuriit.
Dixit autem illi Diabolus: « Si Filius Dei es, dic lapidi huic, ut panis fiat ». Et respondit ad illum Iesus: « Scriptum est: «Non in pane solo vivet homo» ».
Et sustulit illum et ostendit illi omnia regna orbis terræ in momento temporis; et ait ei Diabolus: « Tibi dabo potestatem hanc universam et gloriam illorum, quia mihi tradita est, et, cui volo, do illam: tu ergo, si adoraveris coram me, erit tua omnis ».
Et respondens Iesus dixit illi: « Scriptum est: «Dominum Deum tuum adorabis et illi soli servies» ».
Duxit autem illum in Ierusalem et statuit eum supra pinnam templi et dixit illi: « Si Filius Dei es, mitte te hinc deorsum. Scriptum est enim: «Angelis suis mandabit de te, ut conservent te» et: «In manibus tollent te, ne forte offendas ad lapidem pedem tuum» ».
Et respondens Iesus ait illi: « Dictum est: «Non tentabis Dominum Deum tuum» ».
Et consummata omni tentatione, Diabolus recessit ab illo usque ad tempus.