Feria II - Hebd XV
Tempus « per annum » - Anno secundo
Léctio libri Isaíæ prophétæ 1, 10-17
FRA •
L/F •
CMT
Audite verbum Domini, principes Sodomorum; percipite auribus legem Dei nostri, populus Gomorræ.
« Quo mihi multitudinem victimarum vestrarum?, dicit Dominus. Plenus sum holocaustis arietum et adipe pinguium; et sanguinem vitulorum et agnorum et hircorum nolui. Cum veneritis ante conspectum meum, quis quæsivit hæc de manibus vestris, ut ambularetis in atriis meis?
Ne afferatis ultra sacrificium vanum; abominatio mihi incensum, neomenia et sabbatum et conventus; non feram scelus cum cœtu sollemni; calendas vestras et sollemnitates vestras odivit anima mea, facta sunt mihi molesta, laboravi sustinens. Et cum extenderitis manus vestras, avertam oculos meos a vobis; et cum multiplicaveritis orationem, non exaudiam: manus enim vestræ sanguine plenæ sunt.
Lavamini, mundi estote, auferte malum cogitationum vestrarum ab oculis meis; quiescite agere perverse, discite benefacere: quærite iudicium, subvenite oppresso, iudicate pupillo, defendite viduam ».
Psalmus responsorius 50(49), 8-9, 16bc-17, 21.23
FRA •
L/F •
CMTR/ Qui immaculátus est in via, osténdam illi salutáre Dei.
« Non in sacrificiis tuis arguam te;
holocausta enim tua in conspectu meo sunt semper.
Non accipiam de domo tua vitulos
neque de gregibus tuis hircos ».
« Quare tu enarras præcepta mea
et assumis testamentum meum in os tuum?
Tu vero odisti disciplinam
et proiecisti sermones meos retrorsum ».
« Hæc fecisti, et tacui.
Existimasti quod eram tui similis:
arguam te et statuam illa contra faciem tuam.
Qui immolabit sacrificium laudis, honorificabit me;
et, qui immaculatus est in via, ostendam illi salutare Dei ».
Allelúia
Beáti qui persecutiónem patiúntur propter iustítiam, quóniam ipsórum est regnum cælórum.
Léctio sancti Evangélii secúndum Matthæum 10, 34-42 ; 11, 1
FRA •
L/F •
CMT
In illo tempore: Dixit Iesus apostolis suis:
« Nolite arbitrari quia venerim mittere pacem in terram; non veni pacem mittere sed gladium. Veni enim separare hominem adversus patrem suum et filiam adversus matrem suam et nurum adversus socrum suam: et inimici hominis domestici eius.
Qui amat patrem aut matrem plus quam me, non est me dignus; et, qui amat filium aut filiam super me, non est me dignus; et, qui non accipit crucem suam et sequitur me, non est me dignus. Qui invenerit animam suam, perdet illam; et, qui perdiderit animam suam propter me, inveniet eam.
Qui recipit vos, me recipit; et, qui me recipit, recipit eum, qui me misit.
Qui recipit prophetam in nomine prophetæ, mercedem prophetæ accipiet; et, qui recipit iustum in nomine iusti, mercedem iusti accipiet.
Et, quicumque potum dederit uni ex minimis istis calicem aquæ frigidæ tantum in nomine discipuli, amen dico vobis: Non perdet mercedem suam ».
Et factum est, cum consummasset Iesus præcipiens Duodecim discipulis suis, transiit inde, ut doceret et prædicaret in civitatibus eorum.