Feria II - Hebd XVI
Tempus « per annum » - Anno secundo
Léctio libri Michææ prophétæ 6, 1-4.6-8
FRA •
L/F •
CMT
Audite, quæ Dominus loquitur: « Surge, contende iudicio coram montibus, et audiant colles vocem tuam ». Audite, montes, iudicium Domini, et auscultate, fundamenta terræ; quia iudicium Domini cum populo suo, et cum Israel iudicio contendit.
« Popule meus, quid feci tibi et quid molestus fui tibi? Responde mihi. Ego eduxi te de terra Ægypti et de domo servientium liberavi te et misi ante faciem tuam Moysen et Aaron et Mariam ».
« Quid dignum offeram Domino, dum curvo genu Deo excelso? Numquid offeram ei holocautomata et vitulos anniculos? Numquid placebunt Domino milia arietum, multa milia torrentium olei? Numquid dabo primogenitum meum pro scelere meo, fructum ventris mei pro peccato animæ meæ?”.
Indicatum est tibi, o homo, quid sit bonum, et quid Dominus quærat a te: utique facere iudicium et diligere caritatem et sollicitum ambulare cum Deo tuo.
Psalmus responsorius 50(49), 5-6, 8-9, 16bc-17, 21.23
FRA •
L/F •
CMTR/ Qui immaculátus est in via, osténdam illi salutáre Dei.
« Congregate mihi sanctos meos,
qui disposuerunt testamentum meum in sacrificio ».
Et annuntiabunt cæli iustitiam eius,
quoniam Deus iudex est.
« Non in sacrificiis tuis arguam te;
holocausta enim tua in conspectu meo sunt semper.
Non accipiam de domo tua vitulos
neque de gregibus tuis hircos ».
« Quare tu enarras præcepta mea
et assumis testamentum meum in os tuum?
Tu vero odisti disciplinam
et proiecisti sermones meos retrorsum ».
« Hæc fecisti, et tacui.
Existimasti quod eram tui similis:
arguam te et statuam illa contra faciem tuam.
Qui immolabit sacrificium laudis, honorificabit me;
et, qui immaculatus est in via, ostendam illi salutare Dei ».
Allelúia
Hódie, nolíte obduráre corda vestra, sed vocem Dómini audíte.
Léctio sancti Evangélii secúndum Matthæum 12, 38-42
FRA •
L/F •
CMT
In illo tempore:
Responderunt Iesu quidam de scribis et pharisæis dicentes: « Magister, volumus a te signum videre ». Qui respondens ait illis:
« Generatio mala et adultera signum requirit; et signum non dabitur ei, nisi signum Ionæ prophetæ. Sicut enim fuit Ionas in ventre ceti tribus diebus et tribus noctibus, sic erit Filius hominis in corde terræ tribus diebus et tribus noctibus.
Viri Ninevitæ surgent in iudicio cum generatione ista et condemnabunt eam, quia pænitentiam egerunt in prædicatione Ionæ; et ecce plus quam Iona hic!
Regina austri surget in iudicio cum generatione ista et condemnabit eam, quia venit a finibus terræ audire sapientiam Salomonis; et ecce plus quam Salomon hic! ».