Feria IV - Hebd XVII
Tempus « per annum » - Anno secundo
Léctio libri Ieremiæ prophétæ 15, 10.16-21
FRA •
L/F •
CMT
Væ mihi, mater mea, quoniam genuisti me virum rixæ et virum discordiæ in universa terra! Non feneravi, nec feneravit mihi quisquam; omnes maledicunt mihi.
Inventi sunt sermones tui, et comedi eos, et factum est mihi verbum tuum in gaudium et in lætitiam cordis mei, quoniam invocatum est nomen tuum super me, Domine, Deus exercituum.
Non sedi in concilio ludentium et gloriatus sum; a facie manus tuæ solus sedebam, quoniam indignatione replesti me. Quare factus est dolor meus perpetuus, et plaga mea desperabilis renuit curari? Factus es mihi quasi rivus mendax, aquæ infideles.
Propter hoc hæc dixit Dominus: « Si converteris, convertam te, et ante faciem meam stabis; et si separaveris pretiosum a vili, quasi os meum eris; convertentur ipsi ad te, et tu non converteris ad eos. Et dabo te populo huic in murum æreum fortem; et bellabunt adversum te et non prævalebunt, quia ego tecum sum, ut salvem te et eruam te, dicit Dominus. Et liberabo te de manu pessimorum et redimam te de manu fortium ».
Psalmus responsorius 59(58), 2-3, 4-5a, 10-11, 17, 18
FRA •
L/F •
CMTR/ Deus refúgium meum in die tribulatiónis meæ.
Eripe me de inimicis meis, Deus meus,
et ab insurgentibus in me protege me.
Eripe me de operantibus iniquitatem
et de viris sanguinum salva me.
Quia ecce insidiati sunt animæ meæ,
irruerunt in me fortes.
Neque delictum neque peccatum in me est, Domine.
Fortitudo mea, tibi attendam,
quia, Deus, præsidium meum es.
Deus meus, misericordia eius præveniet me.
Deus faciet, ut despiciam inimicos meos.
Ego autem cantabo fortitudinem tuam
et exsultabo mane misericordiam tuam,
quia factus es præsidium meum
et refugium meum in die tribulationis meæ.
Fortitudo mea, tibi psallam,
quia, Deus, præsidium meum es:
Deus meus misericordia mea.
Allelúia
Vos dixi amícos, dicit Dóminus, quia ómnia, quæ audívi a Patre meo, nota feci vobis.
Léctio sancti Evangélii secúndum Matthæum 13, 44-46
FRA •
L/F •
CMT
In illo tempore: Dixit Iesus turbis:
« Simile est regnum cælorum thesauro abscondito in agro; quem qui invenit homo abscondit et præ gaudio illius vadit et vendit universa, quæ habet, et emit agrum illum.
Iterum simile est regnum cælorum homini negotiatori quærenti bonas margaritas. Inventa autem una pretiosa margarita, abiit et vendidit omnia, quæ habuit, et emit eam. »