Feria III - Hebd XX
Tempus « per annum » - Anno secundo
Léctio libri Ezechiélis prophétæ 28, 1-10
FRA •
L/F •
CMT
Factus est sermo Domini ad me dicens:
« Fili hominis, dic principi Tyri: Hæc dicit Dominus Deus: Eo quod elevatum est cor tuum, et dixisti: “Deus ego sum et in cathedra deorum sedeo in corde maris!”, cum sis homo et non Deus, et dedisti cor tuum quasi cor Dei. Ecce sapientior es tu Danel, omne secretum non est absconditum a te, in sapientia et prudentia tua fecisti tibi opes et acquisisti aurum et argentum in thesauris tuis; in multitudine sapientiæ tuæ et in negotiatione tua multiplicasti tibi opes, et elevatum est cor tuum in opibus tuis.
Propterea hæc dicit Dominus Deus: Eo quod fecisti cor tuum quasi cor Dei, idcirco ecce ego adducam super te alienos violentissimos gentium; et nudabunt gladios suos super pulchritudinem sapientiæ tuæ et polluent splendorem tuum. In fossam detrahent te, et morieris interitu occisorum in corde maris. Numquid dicens loqueris: “Deus ego sum!” coram interficientibus te, cum sis homo et non Deus in manu occidentium te? Morte incircumcisorum morieris in manu alienorum, quia ego locutus sum », ait Dominus Deus.
Psalmus responsorius : Liber Deuteronómii 32, 26-27ab, 27cd.28, 30, 35cd-36ab
FRA •
L/F •
CMTR/ Ego occídam et ego vívere faciam.
« Dixi: Disperdam eos,
cessare faciam ex hominibus memoriam eorum!,
sed arrogantiam inimicorum timui,
ne superbirent hostes eorum.
Et dicerent: "Manus nostra excelsa,
et non Dominus fecit hæc omnia!".
Gens enim absque consilio est
et sine prudentia.
Quomodo persequatur unus mille,
et duo fugent decem milia?
Nonne ideo, quia Petra eorum vendidit eos,
et Dominus tradidit illos?”.
Iuxta est dies perditionis,
et adesse festinat sors eorum.
Iudicabit Dominus populum suum
et in servis suis miserebitur.
Allelúia
Iesus Christus egénus factus est, cum esset dives, ut illíus inópia vos dívites essétis.
Léctio sancti Evangélii secúndum Matthæum 19, 23-30
FRA •
L/F •
CMT
In illo tempore:
Dixit Iesus discipulis suis: « Amen dico vobis: Dives difficile intrabit in regnum cælorum. Et iterum dico vobis: Facilius est camelum per foramen acus transire, quam divitem intrare in regnum Dei ».
Auditis autem his, discipuli mirabantur valde dicentes: « Quis ergo poterit salvus esse? ».
Aspiciens autem Iesus dixit illis: « Apud homines hoc impossibile est, apud Deum autem omnia possibilia sunt ».
Tunc respondens Petrus dixit ei: « Ecce nos reliquimus omnia et secuti sumus te. Quid ergo erit nobis? ».
Iesus autem dixit illis: « Amen dico vobis quod vos, qui secuti estis me, in regeneratione, cum sederit Filius hominis in throno gloriæ suæ, sedebitis et vos super thronos duodecim, iudicantes duodecim tribus Israel. Et omnis, qui reliquit domos vel fratres aut sorores aut patrem aut matrem aut filios aut agros propter nomen meum, centuplum accipiet et vitam æternam possidebit.
Multi autem erunt primi novissimi, et novissimi primi ».