Dominica XXI
Tempus « per annum » - Anno A
Léctio libri Isaíæ prophétæ 22, 19-23
FRA •
L/F •
CMT
Hæc dicit Dominus Sobnæ præposito templi:
« Expellam te de statione tua et de ministerio tuo deponam te. Et erit in die illa: vocabo servum meum Eliachim filium Helciæ et induam illum tunicam tuam et cingulo tuo cingam eum et potestatem tuam dabo in manu eius; et erit in patrem habitantibus Ierusalem et domui Iudæ.
Et dabo clavem domus David super umerum eius; et aperiet, et non erit qui claudat; et claudet, et non erit qui aperiat. Et figam illum paxillum in loco securo, et erit in solium gloriæ domui patris sui ».
Psalmus responsorius 138(137), 1-2a, 2bcd-3, 6.8bc
FRA •
L/F •
CMTR/ Dómine, misericórdia tua in sæculum: ópera mánuum tuárum ne despícias.
Confitebor tibi, Domine, in toto corde meo,
quoniam audisti verba oris mei.
In conspectu angelorum psallam tibi,
adorabo ad templum sanctum tuum.
Et confitebor nomini tuo
propter misericordiam tuam et veritatem tuam,
quoniam magnificasti super omne nomen eloquium tuum.
In quacumque die invocavero te, exaudi me;
multiplicabis in anima mea virtutem.
Quoniam excelsus Dominus et humilem respicit
et superbum a longe cognoscit.
Domine, misericordia tua in sæculum:
opera manuum tuarum ne despicias.
Léctio Epístolæ béati Pauli apóstoli ad Romános 11, 33-36
FRA •
L/F •
CMT
O altitudo divitiarum et sapientiæ et scientiæ Dei! Quam incomprehensibilia sunt iudicia eius, et investigabiles viæ eius! Quis enim cognovit sensum Domini? Aut quis consiliarius eius fuit? Aut quis prior dedit illi, et retribuetur ei? Quoniam ex ipso et per ipsum et in ipsum omnia. Ipsi gloria in sæcula. Amen.
Allelúia
Tu es Petrus, et super hanc petram ædificábo Ecclésiam meam; et portæ ínferi non prævalébunt advérsus eam.
Léctio sancti Evangélii secúndum Matthæum 16, 13-20
FRA •
L/F •
CMT
In illo tempore:
Venit Iesus in partes Cæsareæ Philippi et interrogabat discipulos suos dicens: « Quem dicunt homines esse Filium hominis?».
At illi dixerunt: « Alii Ioannem Baptistam, alii autem Eliam, alii vero Ieremiam, aut unum ex prophetis ».
Dicit illis: « Vos autem quem me esse dicitis? ».
Respondens Simon Petrus dixit: « Tu es Christus, Filius Dei vivi ».
Respondens autem Iesus dixit ei: « Beatus es, Simon Bariona, quia caro et sanguis non revelavit tibi sed Pater meus, qui in cælis est. Et ego dico tibi: Tu es Petrus, et super hanc petram ædificabo Ecclesiam meam; et portæ inferi non prævalebunt adversum eam. Tibi dabo claves regni cælorum; et quodcumque ligaveris super terram, erit ligatum in cælis, et quodcumque solveris super terram, erit solutum in cælis ».
Tunc præcepit discipulis, ut nemini dicerent quia ipse esset Christus.