« Nunc, Israel, audi præcepta et iudicia, quæ ego doceo vos, ut facientes ea vivatis et ingredientes possideatis terram, quam Dominus, Deus patrum vestrorum, daturus est vobis. Non addetis ad verbum, quod vobis loquor, neque auferetis ex eo; custodite mandata Domini Dei vestri, quæ ego præcipio vobis.

Hæc est enim vestra sapientia et intellectus coram populis, ut audientes universa præcepta hæc dicant: “En populus sapiens et intellegens, gens magna hæc!”. Quæ est enim alia natio tam grandis, quæ habeat deos appropinquantes sibi, sicut Dominus Deus noster adest cunctis obsecrationibus nostris? Et quæ est alia gens sic inclita, ut habeat præcepta iustaque iudicia, sicut est universa lex hæc, quam ego proponam hodie ante oculos vestros? ».

Omne datum optimum et omne donum perfectum de sursum est, descendens a Patre luminum, apud quem non est transmutatio nec vicissitudinis obumbratio. Voluntarie genuit nos verbo veritatis, ut simus primitiæ quædam creaturæ eius.

In mansuetudine suscipite insitum verbum, quod potest salvare animas vestras. Estote autem factores verbi et non auditores tantum fallentes vosmetipsos.

Religio munda et immaculata apud Deum et Patrem hæc est: visitare pupillos et viduas in tribulatione eorum, immaculatum se custodire ab hoc sæculo.

Cconveniunt ad Iesum pharisæi et quidam de scribis venientes ab Hierosolymis; et cum vidissent quosdam ex discipulis eius communibus manibus, id est non lotis, manducare panes — pharisæi enim et omnes Iudæi, nisi pugillo lavent manus, non manducant, tenentes traditionem seniorum; et a foro nisi baptizentur, non comedunt; et alia multa sunt, quæ acceperunt servanda: baptismata calicum et urceorum et æramentorum et lectorum — et interrogant eum pharisæi et scribæ: « Quare discipuli tui non ambulant iuxta traditionem seniorum, sed communibus manibus manducant panem? ».

At ille dixit eis: « Bene prophetavit Isaias de vobis hypocritis, sicut scriptum est: «Populus hic labiis me honorat, cor autem eorum longe est a me; in vanum autem me colunt docentes doctrinas præcepta hominum». Relinquentes mandatum Dei tenetis traditionem hominum ».

Et advocata iterum turba, dicebat illis: « Audite me, omnes, et intellegite: Nihil est extra hominem introiens in eum, quod possit eum coinquinare; sed quæ de homine procedunt, illa sunt, quæ coinquinant hominem! ». ab intus enim de corde hominum cogitationes malæ procedunt, fornicationes, furta, homicidia, adulteria, avaritiæ, nequitiæ, dolus, impudicitia, oculus malus, blasphemia, superbia, stultitia: omnia hæc mala ab intus procedunt et coinquinant hominem ».