Dominica XXXII
Tempus « per annum » - Anno C
Léctio libri secúndi Maccabæórum 7, 1-2.9-14
FRA •
L/F •
CMT
In diebus illis:
Contigit septem fratres una cum matre apprehensos compelli a rege attingere contra fas carnes porcinas, flagris et nervis cruciatos.
Unus autem ex illis exstans prior locutor sic ait: « Quid es quæsiturus, et quid vis discere a nobis? Parati sumus mori magis quam patrias leges prævaricari ».
[Secundus autem] in ultimo spiritu constitutus, sic ait: « Tu quidem, scelestissime, de præsenti vita nos perdis; sed rex mundi defunctos nos pro suis legibus in æternam vitæ resurrectionem suscitabit ».
Post hunc tertius illudebatur; et linguam postulatus cito protulit et manus constanter extendit et fortiter ait: « E cælo ista possideo et propter illius leges hæc ipsa despicio et ab ipso rursus me ea recepturum spero », ita ut rex et, qui cum ipso erant, mirarentur adulescentis animum, quomodo pro nihilo duceret cruciatus.
Et hoc ita defuncto, quartum vexabant similiter torquentes; et, cum iam esset ad mortem, sic ait: « Potius est ab hominibus morti datos spem exspectare a Deo, iterum ab ipso resuscitandos; tibi enim resurrectio ad vitam non erit ».
Psalmus responsorius 17(16), 1, 5-6, 8.15
FRA •
L/F •
CMTR/ Satiábor, cum evigilávero, conspéctu tuo, Dómine.
Exaudi, Domine, iustitiam meam,
intende deprecationem meam.
Auribus percipe orationem meam,
non in labiis dolosis.
Retine gressus meos in semitis tuis,
ut non moveantur vestigia mea.
Ego ad te clamavi, quoniam exaudis me, Deus;
inclina aurem tuam mihi et exaudi verba mea.
Custodi me ut pupillam oculi,
sub umbra alarum tuarum protege me
Ego autem in iustitia videbo faciem tuam;
satiabor, cum evigilavero, conspectu tuo.
Léctio Epístolæ secúndæ béati Pauli apóstoli ad Thessalonicénses 2, 16 - 3, 5
FRA •
L/F •
CMT
Fratres:
Ipse Dominus noster Iesus Christus et Deus Pater noster, qui dilexit nos et dedit consolationem æternam et spem bonam in gratia, consoletur corda vestra et confirmet in omni opere et sermone bono.
De cetero, fratres, orate pro nobis, ut sermo Domini currat et glorificetur sicut et apud vos, et ut liberemur ab importunis et malis hominibus; non enim omnium est fides. Fidelis autem Dominus est, qui confirmabit vos et custodiet a Malo. Confidimus autem de vobis in Domino, quoniam, quæ præcipimus, et facitis et facietis. Dominus autem dirigat corda vestra in caritatem Dei et patientiam Christi.
Allelúia
Iesus Christus est testis fidélis, primogénitus mortuórum; ipsi glória et impérium in sæcula sæculórum. Amen.
In illo tempore:
Accesserunt quidam sadducæorum, qui negant esse resurrectionem, et interrogaverunt Iesum dicentes:
« Magister, Moyses scripsit nobis, si frater alicuius mortuus fuerit habens uxorem et hic sine filiis fuerit, ut accipiat eam frater eius uxorem et suscitet semen fratri suo. Septem ergo fratres erant: et primus accepit uxorem et mortuus est sine filiis; et sequens et tertius accepit illam, similiter autem et septem non reliquerunt filios et mortui sunt. Novissima mortua est et mulier.
Mulier ergo in resurrectione cuius eorum erit uxor? Si quidem septem habuerunt eam uxorem ».
Et ait illis Iesus: « Filii sæculi huius nubunt et traduntur ad nuptias; illi autem, qui digni habentur sæculo illo et resurrectione ex mortuis, neque nubunt neque ducunt uxores. Neque enim ultra mori possunt: æquales enim angelis sunt et filii sunt Dei, cum sint filii resurrectionis.
Quia vero resurgant mortui, et Moyses ostendit secus rubum, sicut dicit: «Dominum Deum Abraham et Deum Isaac et Deum Iacob». Deus autem non est mortuorum sed vivorum: omnes enim vivunt ei ».
vel brevior:
Léctio sancti Evangélii secúndum Lucam 20, 27.34-38
FRA •
L/F
In illo tempore:
Accesserunt quidam sadducæorum, qui negant esse resurrectionem, et interrogaverunt Iesum. Et ait illis Iesus:
« Filii sæculi huius nubunt et traduntur ad nuptias; illi autem, qui digni habentur sæculo illo et resurrectione ex mortuis, neque nubunt neque ducunt uxores. Neque enim ultra mori possunt: æquales enim angelis sunt et filii sunt Dei, cum sint filii resurrectionis.
Quia vero resurgant mortui, et Moyses ostendit secus rubum, sicut dicit: «Dominum Deum Abraham et Deum Isaac et Deum Iacob». Deus autem non est mortuorum sed vivorum: omnes enim vivunt ei ».