Dominica XXXIII
Tempus « per annum » - Anno C
Léctio libri Malachíæ prophétæ 3, 19-20a
FRA •
L/F •
CMT
« Ecce enim dies veniet succensa quasi caminus; et erunt omnes superbi et omnes facientes impietatem stipula; et inflammabit eos dies veniens, dicit Dominus exercituum, quæ non derelinquet eis radicem et ramum.
Et orietur vobis timentibus nomen meum sol iustitiæ et sanitas in pennis eius ».
Psalmus responsorius 98(97), 5-6, 7-8, 9
FRA •
L/F •
CMTR/ Venit Dóminus iudicáre pópulus in æquitáte.
Psallite Domino in cithara,
in cithara et voce psalmi;
in tubis ductilibus et voce tubæ corneæ,
iubilate in conspectu regis Domini.
Sonet mare et plenitudo eius,
orbis terrarum et qui habitant in eo.
Flumina plaudent manu,
simul montes exsultabunt.
A conspectu Domini, quoniam venit iudicare terram.
Iudicabit orbem terrarum in iustitia
et populos in æquitate.
Léctio Epístolæ secúndæ béati Pauli apóstoli ad Thessalonicénses 3, 7-12
FRA •
L/F •
CMT
Fratres:
Scitis quemadmodum oporteat imitari nos, quoniam non inordinati fuimus inter vos neque gratìs panem manducavimus ab aliquo sed in labore et fatigatione, nocte et die operantes, ne quem vestrum gravaremus; non quasi non habuerimus potestatem, sed ut nosmetipsos formam daremus vobis ad imitandum nos.
Nam et cum essemus apud vos, hoc præcipiebamus vobis: Si quis non vult operari, nec manducet. Audimus enim inter vos quosdam ambulare inordinate, nihil operantes sed curiose agentes; his autem, qui eiusmodi sunt, præcipimus et obsecramus in Domino Iesu Christo, ut cum quiete operantes suum panem manducent.
Allelúia
Respícite et leváte cápita vestra, quóniam appropínquat redémptio vestra.
Léctio sancti Evangélii secúndum Lucam 21, 5-19
FRA •
L/F •
CMT
In illo tempore:
Quibusdam dicentibus de templo, quod lapidibus bonis et donis ornatum, esset dixit Iesus: « Hæc quæ videtis, venient dies, in quibus non relinquetur lapis super lapidem, qui non destruatur ».
Interrogaverunt autem illum dicentes: « Præceptor, quando ergo hæc erunt, et quod signum, cum fieri incipient? ».
Qui dixit: « Videte, ne seducamini. Multi enim venient in nomine meo dicentes: «Ego sum» et: «Tempus appropinquavit». Nolite ergo ire post illos. Cum autem audieritis prœlia et seditiones, nolite terreri; oportet enim primum hæc fieri, sed non statim finis ».
Tunc dicebat illis: « Surget gens contra gentem, et regnum adversus regnum; et terræ motus magni et per loca fames et pestilentiæ erunt, terroresque et de cælo signa magna erunt.
Sed ante hæc omnia inicient vobis manus suas et persequentur tradentes in synagogas et custodias, et trahemini ad reges et præsides propter nomen meum; continget autem vobis in testimonium.
Ponite ergo in cordibus vestris non præmeditari quemadmodum respondeatis; ego enim dabo vobis os et sapientiam, cui non poterunt resistere vel contradicere omnes adversarii vestri.
Trademini autem et a parentibus et fratribus et cognatis et amicis, et morte afficient ex vobis, et eritis odio omnibus propter nomen meum. Et capillus de capite vestro non peribit. In patientia vestra possidebitis animas vestras ».