Dominica VI
Tempus « per annum » - Anno A
Léctio libri Ecclesiástici 15, 16-21
FRA •
L/F •
CMT
Si volueris mandata servare, conservabunt te; si confidis in illo, etiam tu vives.
Apposuit tibi aquam et ignem; ad quod volueris, porrige manum tuam.
Ante hominem vita et mors, bonum et malum: quod placuerit ei, dabitur illi.
Quoniam multa sapientia Dei, et fortis in potentia videns omnes sine intermissione.
Oculi Domini ad timentes eum, et ipse agnoscit omnem operam hominis.
Nemini mandavit impie agere et nemini dedit spatium peccandi.
Psalmus responsorius 119(118), 1-2, 4-5, 17-18, 33-34
FRA •
L/F •
CMTR/ Beáti qui ámbulant in lege Dómini.
Beati immaculati in via,
qui ambulant in lege Domini.
Beati, qui servant testimonia eius,
in toto corde exquirunt eum.
Tu mandasti
mandata tua custodiri nimis.
Utinam dirigantur viæ meæ
ad custodiendas iustificationes tuas!
Benefac servo tuo, et vivam
et custodiam sermonem tuum.
Revela oculos meos,
et considerabo mirabilia de lege tua.
Legem pone mihi, Domine, viam iustificationum tuarum,
et servabo eam semper.
Da mihi intellectum, et servabo legem tuam
et custodiam illam in toto corde meo.
Léctio Epístolæ primæ béati Pauli apóstoli ad Corínthios 2, 6-10
FRA •
L/F •
CMT
Fratres:
Sapientiam loquimur inter perfectos, sapientiam vero non huius sæculi neque principum huius sæculi, qui destruuntur, sed loquimur Dei sapientiam in mysterio, quæ abscondita est, quam prædestinavit Deus ante sæcula in gloriam nostram, quam nemo principum huius sæculi cognovit; si enim cognovissent, numquam Dominum gloriæ crucifixissent. Sed sicut scriptum est: « Quod oculus non vidit, nec auris audivit, nec in cor hominis ascendit, quæ præparavit Deus his, qui diligunt illum ».
Nobis autem revelavit Deus per Spiritum; Spiritus enim omnia scrutatur, etiam profunda Dei.
Allelúia
Benedíctus es, Pater, Dómine cæli et terræ, quia mystéria regni párvulis revelásti.
In illo tempore: Dixit Iesus discipulis suis:
« Nolite putare quoniam veni solvere Legem aut Prophetas; non veni solvere, sed adimplere. Amen quippe dico vobis: Donec transeat cælum et terra, iota unum aut unus apex non præteribit a Lege, donec omnia fiant.
Qui ergo solverit unum de mandatis istis minimis et docuerit sic homines, minimus vocabitur in regno cælorum; qui autem fecerit et docuerit, hic magnus vocabitur in regno cælorum.
Dico enim vobis: Nisi abundaverit iustitia vestra plus quam scribarum et pharisæorum, non intrabitis in regnum cælorum.
Audistis quia dictum est antiquis: «Non occides; qui autem occiderit, reus erit iudicio». Ego autem dico vobis: Omnis, qui irascitur fratri suo, reus erit iudicio; qui autem dixerit fratri suo: «Racha», reus erit concilio; qui autem dixerit: «Fatue», reus erit gehennæ ignis.
Si ergo offeres munus tuum ad altare, et ibi recordatus fueris quia frater tuus habet aliquid adversum te, relinque ibi munus tuum ante altare et vade, prius, reconciliare fratri tuo et tunc veniens offer munus tuum.
Esto consentiens adversario tuo cito, dum es in via cum eo, ne forte tradat te adversarius iudici, et iudex tradat te ministro, et in carcerem mittaris. Amen dico tibi: Non exies inde, donec reddas novissimum quadrantem.
Audistis quia dictum est: "Non mœchaberis". Ego autem dico vobis: Omnis, qui viderit mulierem ad concupiscendum eam, iam mœchatus est eam in corde suo.
Quod si oculus tuus dexter scandalizat te, erue eum et proice abs te; expedit enim tibi, ut pereat unum membrorum tuorum, quam totum corpus tuum mittatur in gehennam. Et si dextera manus tua scandalizat te, abscide eam et proice abs te; expedit enim tibi, ut pereat unum membrorum tuorum, quam totum corpus tuum abeat in gehennam.
Dictum est autem: «Quicumque dimiserit uxorem suam, det illi libellum repudii». Ego autem dico vobis: Omnis, qui dimiserit uxorem suam, excepta fornicationis causa, facit eam mœchari; et, qui dimissam duxerit, adulterat.
Iterum audistis quia dictum est antiquis: "Non periurabis; reddes autem Domino iuramenta tua". Ego autem dico vobis: Non iurare omnino, neque per cælum, quia thronus Dei est, neque per terram, quia scabellum est pedum eius, neque per Hierosolymam, quia civitas est magni Regis; neque per caput tuum iuraveris, quia non potes unum capillum album facere aut nigrum.
Sit autem sermo vester: «Est, est», «Non, non»; quod autem his abundantius est, a Malo est. »
vel brevior:
Léctio sancti Evangelii secundum Matthæum 5, 20-22a.27-28.33-34a.37
FRA •
L/F
In illo tempore: Dixit Iesus discipulis suis:
« Dico enim vobis: Nisi abundaverit iustitia vestra plus quam scribarum et pharisæorum, non intrabitis in regnum cælorum.
Audistis quia dictum est antiquis: «Non occides; qui autem occiderit, reus erit iudicio». Ego autem dico vobis: Omnis, qui irascitur fratri suo, reus erit iudicio.
Audistis quia dictum est: "Non mœchaberis". Ego autem dico vobis: Omnis, qui viderit mulierem ad concupiscendum eam, iam mœchatus est eam in corde suo.
Iterum audistis quia dictum est antiquis: "Non periurabis; reddes autem Domino iuramenta tua". Ego autem dico vobis: Non iurare omnino.
Sit autem sermo vester: «Est, est», «Non, non»; quod autem his abundantius est, a Malo est. »