Feria IV - Hebd VII
Tempus « per annum » - Anno primo
Léctio libri Ecclesiástici 4, 12-22
FRA •
L/F •
CMT
Sapientia filiis suis vitam inspiravit et suscipit inquirentes se. Qui illam diligit, diligit vitam; et, qui vigilaverint ad illam, complectentur placorem a Domino.
Qui tenuerint illam, gloriam hereditabunt, et, quo introibit, benedicet Deus. Qui serviunt ei, obsequentes erunt Sancto, et eos, qui diligunt illam, diligit Deus. Qui audit illam, iudicabit gentes; et, qui intuetur illam, permanebit confidens.
Si crediderit ei, hereditabit illam, et erunt in possessione generationes illius. Quoniam in simulatione ambulat cum eo et in primis explorat eum, timorem et tremorem inducet super illum et probabit illum in tentatione doctrinæ suæ, donec ipse teneat eam in cogitationibus suis et credat animæ illius.
Et redibit recta ad illum et firmabit illum et lætificabit illum et denudabit illi absconsa sua et thesaurizabit super illum scientiam et intellectum iustitiæ. Si autem oberraverit, derelinquet eum et tradet eum in manus inimici sui.
Psalmus responsorius 119(118), 165, 168, 171, 172, 174, 175
FRA •
L/F •
CMTR/ Pax multa diligéntibus legem tuam, Dómine.
Pax multa diligentibus legem tuam,
et non est illis scandalum.
Servavi mandata tua et testimonia tua,
quia omnes viæ meæ in conspectu tuo.
Eructabunt labia mea hymnum,
cum docueris me iustificationes tuas.
Cantet lingua mea eloquium tuum,
quia omnia præcepta tua iustitia.
Concupivi salutare tuum, Domine,
et lex tua delectatio mea est.
Vivet anima mea et laudabit te,
et iudicia tua adiuvabunt me.
Allelúia
Ego sum via et véritas et vita, dicit Dóminus; nemo venit ad Patrem, nisi per me.
Léctio sancti Evangélii secúndum Marcum 9, 38-40
FRA •
L/F •
CMT
In illo tempore:
Dixit Iesu Ioannes: « Magister, vidimus quendam in nomine tuo eicientem dæmonia, et prohibebamus eum, quia non sequebatur nos ».
Iesus autem ait: « Nolite prohibere eum. Nemo est enim, qui faciat virtutem in nomine meo et possit cito male loqui de me; qui enim non est adversum nos, pro nobis est. »